Shillong, Nailar 30
Ka Mawlai Sports Club ka la shah pynkup burom ha ka Sorkar Jylla da ka khusnam pisa kaba T. 30 lak tyngka, ha ka jingrakhe ïa ka National Sports Day, kaba la long ha ka sngi Saitjaiñ ha State Convention Centre, Shillong.
Ka Mawlai ka dei ka kynhun kaba la rah ïa ka nam lahduh ha ka 4th Meghalaya State League ba la pynïaid da ka Meghalaya Football Association (MFA) bad kaba la ïoh rung ruh sha ka play off jong ka I-League 3 2025-26 ba la pynïaid da ka All India Football Association, hynrei ka la shah rem noh ha kane ka lympung.
Ïa katei ka cheque la pdiang da ki nongkitkam katei ka klob hapoh ka jingïalam u Bah Marcel Kharbani kum u President, na u Myntri ka tnat ïalehkai u Bah Wailadmiki Shylla kum u kongsan ha kaba la ïadon lang u Chief Secretary ka Jylla u Dr. Shakil P. Ahammed (IAS), u Director ka tnat ïalehkai Bah Alertson Nongbri, u General Secretary ka Meghalaya State Olympic Association Bah Finely Lad Pariat, ki ophisar ka tnat ïalehkai lem bad ki nongïalehkai.
Ha kajuh ka por kane ka jingpynkup burom ka long ban ai jingkyrshan ïa kane ka klob, kaba shim bynta ha kane ka aïom ha ka Shillong Premier Lea-gue ba la pynïaid da ka Shillong Sports Association.
