Agartala, Nailar:
U Myntri Rangbah jong ka Tripura u Manik Saha, ha ki khyndiat sngi ba la leit, u la ong ba ka sorkar kan leh katkum ka aiñ pyrshah ïa ki pulit lada lap ba ki donkti ha ka kam khaïi drok, ka khaïi pateng, ka jaka buh jaka sah ne kiwei kiwei ki kam kiba ïadei bad kane.
U la pyntip sha ka ïingdorbar ka jylla ba ka jingshah rai pynrem ha ki mukotduma ba la mudui hapoh ka Narcotic Drugs and Psychotropic Substances (NDPS) ka la kiew sha ka 14.7 percent haduh u bnai Naitung jong une u snem.
Haba jubab ïa ka jingkylli jong u MLA ka Congress u Gopal Chandra Roy ha ka sngi ba ar jong ka jingïashong dorbar jong ka Ïingdorbar, u Saha u la ong, “Ka sorkar ka la bud ïa ka polisi jong ka zero tolerance pyrshah ïa ka jingkhaïi drok bad kan leh da kaba tyngeh pyrshah ïa ki pulit lada lap ïa ka jingdonkti jong ki.”
U Roy u la pynpaw ïa ka jingsngewkhia halor ka jingkiew jong ka jingkhaïi drok bad ka jingktah jong ka ïa ki samla bad u la buh jingkylli haduh katno lah ban shim ïa ki lad ki lynti kiba thikna pyrshah ïa ki kynhun khaïi drok kiba heh lada ki dkhot jong ka tnat pulit ki donkti hi.
U la pan jingtip bniah ruh halor ka jingdon jong ki pulit kiba la kynnoh ba ki donkti ha ka kam khaïi drok kiba la shah tohkit, shah kem ne shah pynngat ha ki kyndon aiñ, kumjuh ruh katno tylli ki jingujor ejahar ba la mudui pyrshah ïa ki.
Ha ka jubab jong u, u Saha u la ong ba ka sorkar ka ïatreilang bad ki bor pulit, ki bor pahara khappud bad kiwei ki tnad ban khang lad ïa ka jingkhaïi bad jingdih drok. U la ong ba la shimkhia ïa kito kiba donkti ha ki kam runar kiba ïadei bad u drok ryngkat bad ki prokram pynsngewthuh paidbah.
U Myntri Rangbah ka jylla u la ong ruh ba ki dawai thok ki rung sha Tripura na shabar ka jylla. “Ki don ki briew na Uttar Pradesh bad Delhi kiba la shah kem ha kaba ïadei bad ki kam khaïi drok”, la ong u Saha.
U Saha u la ong ba ka sorkar ka pynleit jingmut ha kaba pynkiew ïa ka jingshah rai pynrem ha ki mukotduma NDPS.
Ki nongmudui sorkar bad ki nongïarap nongmudui sorkar ki dang pynlong jingïalang bad ki ophisar pulit ban pynbha ïa ka jingïatreilang ha ka jingtohkit bad jingpynngat ha ki kyndon, u la ong.
U Myntri Rangbah u la ong ba la pynmih ruh ïa ki jingbthah ban shimkhia ïa ki nongdih drok bad ki nongkhaïi drok kiba rit. “Ha ki khep ba la lap ba ki nongleh kam sniew ki dei ki khynnah rit, yn sa leh katkum ka aiñ, yn kham pynksan ban thmu ïa ki jaka die drok kiba kham heh,” u la ong.
Halor ki jingkynnoh donkti jong ki katto katne ki pulit ha ka jingkhaïi drok, u Saha u la ong ba la dep ban leh eiei pyrshah ïa kito kiba la lap ïa ka jingdonkti jong ki. U la pynpaw biang ba ka sorkar kan ym pyndem wat haba ki pulit ki donkti bad ba yn leh da kaba tyngeh katkum ka aiñ.
U la ong ba ki jingpynjari aiñ bad ki prokram pynsngewthuh paidbah kin dang ïai bteng ban khanglad ïa baroh ar ki jingdih drok bad ka jingkhaïi drok ha ka jylla.
