Mawkyrwat, Nailar 31
Ka shlem treikam jong u Executive Engineer Mawkyrwat Division, ha ka jingïatreilang bad ka District Sports Officer hapoh ka Jal Jeevan Mission, ha ka 29 tarik mynta u bnai Nailar ka la pynlong ïa ka 5-Km Run kaba ka phang pdeng ka long, “Celebrating Water – Securing Sources”, kum shi bynta ka jingrakhe ïa ka Rajya Jal Utsav bad Lok Jal Utsav 2026 ha South West Khasi Hills District.
Kane ka jingïakop mareh ka la sdang na ka PHE Office bad ka la ïaid lyngba Ïew Mawleiñ-Jakrem, Ïew Sakwang, Ïew Pyndensakwang bad District Court, shuwa ban pynkut biang ha ka PHE Office.
Ïa kane ka jingïakop mareh la phiah ha ki saw tylli ki kyrdan, kata Cate-gory-A jong ki shynrang (15-35 snem), ha kaba ki don 46 ngut ki nongïashim bynta; Category-B shynrang (35 snem shaneng) kaba don 18 ngut; Category-C kynthei (15-35 snem) kaba don 15 ngut bad ha ka Category-D kynthei (35 snem shaneng) kiba don 11 ngut.
Ïa ka nam nongjop ha ka Category-A la khur da u Wonderful Paliar, ba-ar u Jinesfulson Hoojon bad balai u Bankerlang Kharjah-rin. Ha Category-B la jop da u Tlanding Wahlang, ba-ar u Jomsingstar Ramsiej bad balai u Wanbokstar Wan-ñiang.
Ha Category-C la jop da ka Phidashisha Lyng-doh, ba-ar ka Larisha Thongnibah bad balai ka Elfidary Wartde. Katba ha Category-D la jop da ka Twina Parïong, ba-ar ka Thlingda Wanñiang bad balai ka Rolinda Wanñiang.
U Bah E. Khongthiang, SDO (TC), PHE Mawkyrwat Division u la long u kongsan bad u la kaweh ïa ka lama ban sdang ïa kane ka jingïakop mareh. Ha kane ka jingïalang ki la don lang ruh ki ophisar bad ki nongtrei jong ka PHE Mawkyrwat Division bad ka District Sports Office, South West Khasi Hills District.
