Aizawl, Nailar:
Ka Mizoram mynta ka don 48 tylli ki Centre bad ki ïing kiba ai jingsumar bad jingpynbha ïa ki 5,224 ngut ki briew kiba shah ktah ha ka jingdih drok, la ïathuh ki heh sorkar ha ka sngi U Blei, 30 tarik, Nailar. .
Ka sorkar jylla ka la ai jingïarap pisa haduh 42 lak tyngka sha kine ki Centre bad ki ïing hapoh une u snem, la ïathuh ki heh sorkar.
Kyrpang, ki don 2,255 ngut kiba la shah sumar ha ka ‘Hulhliap’ short-stay centre, ka jaka pynkhuid met kaba la seng da ka sorkar jylla.
Kane ka Centre ka la pyndep khyndai tylli ki kynhun naduh ba la sdang ha u bnai Jylliew jong u snem ba la dep.
Ka sorkar ka la pynlut palat 3.86 klur tyngka na ka bynta ki khyndai tylli ki kynhun, katba katei ka jaka ka la ïoh jingïarap sa 1.34 lak tyngka na kiwei pat ki lad, la ong u heh sorkar.
Ïa kane ka jaka sah ba shipor ka ‘Hulhliap’ na ka bynta ki briew kiba shah ktah ha ka jingdih drok la plie ha ka 23 tarik, Jylliew mynshem snem ha ka Synod Revival Camping Centre kaba don ha Neihbawi, hajan Aizawl. Ïa kane ka jaka pynkhuid met la shna khnang ban lah ban pdiang kumba 200 ngut ki nongshah sumar ha ka shisien pdiang.
Katkum ka jingïathuh jong ki heh sorkar, kito kiba shah sumar ha kane ka Centre ha kaba sdang ki shah sumar 15 sngi hapoh ka jingpeit jong ki doktor, ki nurse bad ki Counsellor. Hadien kane la bud sa ka jingai jingmut ba kyrpang ha ka jinglong mynsiem.
Hadien ba la dep ban sah ha katei ka jaka, ïa ki nongshah sumar la phah biang sha kiba haïing hasem jong ki lane la phah sha ki jaka pynbha pat ban ïoh jingsumar bad jingkyrshan shuh shuh, la ong ki heh sorkar.
Ka kynhun jong ki jaka pynbha pat jong ka jylla bad ka jaka sumar jong ka Hulhliap ka long shi bynta jong ka jingpyrshang jong ka Mizoram ban ai jingsumar, jingai jingmut bad jingkyrshan pynbha ïa ki briew kiba shah ktah ha ka jingdih drok.
