Shillong, Nailar 31
Ka Nangkiew Irat ka la pynliem noh ïa ka Mylliem da 1-0 kol na ka bynta ban khur jingjop ha ka lympung ïalehkai Shillong Premier League 2026 ha ka lah sngi U Blei ha SSA Stadium, Polo.
Ïa kane ka shi kol jong ka Nangkiew Irat la thep da u Ronaldkydon Lyngdoh Nonglait ha ka minit ba 39.
Da kane ka jingjop, ka Nangkiew Irat ka la khur 7 poiñ bad ban rung sha ka thup jong ka ‘Top 4’, katba ka Mylliem ka la ïai neh sha trai ka miej ïakheiñ poiñ kaba la wan hadien ba ka la shah rem haduh saw sien ha kane ka lympung.
Ha kane ka jingïakhun mynta ka sngi ka Nangkiew Irat ka la pynlehnoh ei ïa kiba bun tylli ki kabu ksiar kiba ka la ïoh khamtam leilei ha kylla step.
Hynrei ïa kane ka shi kol ka la wan hadien ba u Edyvenson Dhar u la ïoh ban rah shakhmat ïa ka bol tad haduh ban da poi haduh ka ‘box’, kaba ha kum kane ka khyllipmat u la lah ban pynbuh sha ka jaka ba la don u Ronald, u bym shym ka pynlehnohei ïa kane ka kabu ksiar ban pynkhih jar.
Katba na ka liang ka Mylliem ruh ka pyrshang lem ban ïai don ha ka thong ban ïakhun tyngeh, kaba ka kabu ksiar ba la paw shynna ka dei hadien ba u Shaibor Nongrum u la khyrwit jam bha ïa ka bol kaba la lait pat sharud, kaba la jia long hadien ba u la kyndit ba kane ka bol kan wan sha u.
Ka kylla miet, ka jingïakhun kam da don kyntien than ban batai, wat hadien ba la mih paw ki katto katne ki jingïapyrshang ban thep kol, kum na u Jefferson Pakynteiñ uba la shut jam bha ïa ka bol ha ka minit ba 68 na bynta ka Nangkiew, hynrei ka bol ka la her beit shalor, katba na ka liang u Alem Khongwir um shym la lah ban ïoh tehlakam ïa ka bol ba la ïarap ban pashat sha u da u Remark Kharmalki.
Ha ka sngi ba-ar ka jingïakhun kan long hapdeng ka Meghalaya Police F.T pyrshah ïa ka Shillong Lajong F.C ha ka por 3:40 baje nohphai sngi, kaba hangne kine ki ar kynhun ki don mynta mar 7 point na ki lai sien ïakhun ba ki la dep bad la khmih lynti ba kin ïa pyrshang ban ïakhun tyngeh na ka bynta ban wanphai ryngkat ki lai poiñ ha kane ka jingïakhun.
