Nongstoiñ, Nailar 31
Ka lympung ïalehkai 41st Meghalaya State Badmin-ton Championship 2026 ba la pynïaid da ka West Khasi Hills District Bad-minton Association (WK-HDBA) haryngkat ka jingkyrshan lang da ka Meghalaya State Badmin-ton Association, ka la poi sha kaba kut ha ka sngi Saitjaiñ ha kaba ka kynhun ïalehkai jong ka East Khasi Hills District ka la long ka lahduh.
Ha kane ka lympung ïalehkai ki la don 10 tylli ki district na kylleng ka Jylla lem bad ka Young Talent Badminton Club Mawlai ki la wan ban ïashim bynta bad haba kheiñ lang baroh ki nongwan shim bynta ki long 245 ngut ha ka liang ki shynrang bad ki kynthei. Ki nongïalehkai shynrang long 182 ngut bad 63 ngut ha ka liang ki kynthei.
Haba phai sha katei ka lympung ïalehkai, ka East Khasi Hills ka la ïoh ban khur haduh 14 tylli ki takma ksiar bad 9 tylli ki takma rupa. Nangta ka WGHD ka la ïoh ban khur 4 tylli ki takma ksiar, ka WJHD ka la ïoh ban khur kawei ka takma ksiar bad 4 tylli ki takma rupa.
Shuh shuh kiwei pat ki kynthup ïa ka EGHD kaba la khur 2 tylli ki takma rupa, nangta ka NGHD ruh ka la ïoh 2 tylli rupa, katba ka WKHD bad ka SWKH pat ki la ïoh mar kawei ka takma rupa.
Nangta, haba phai pat sha ki senior ha ka jingïoh khur takma ki long ka EKHD kaba la khur 2 tylli ki takma ksiar bad 2 tylli ki rupa, kumjuh ruh ka WGHD ka la ïoh 2 tylli ki takma ksiar, katba ka WJHD pat ka la ïoh ban khur kawei ka takma ksiar bad 3 tylli ki takma rupa.
Ha katei ka sngi pynhap pyrda, la ïadon lang ka Deputy Commissioner ka West Khasi Hills ka Hema Nayak (IAS) kum ka kongsan, ha ryngkat ka jingdonlang ruh ki coach jong ka Jylla kiba dang don ha ka jingpynkhreh ïa ka National Games, bad kiwei kiwei pat kiba la sam ruh ïa ki khusnam bapher bapher.
