Shillong, Nailar 31
Ka Tynring bad ka Smit ki la khur jingjop ha ka lympung ïalehkai Second Division Football League 2026 ba la pynïaid da ka Shillong Sports Association ha ka lah sngi U Blei.
Ha ka jingïakhun jong ka Group-B kaba la long ha madan MFA, ka Smit ka la pynliem noh ïa ka Nongmensong da 7-1, katba ka Tynring ka la jop da 3-0 kol ïa ka Jongksha ha ka Group-C kaba la long ha SSA Stadium.
Ha kane ka jingïakhun ka Smit ka la lah ban ïalehkai bha naduh kaba sdang ha kaba ka la ïoh ban thep kol lyngba u Nathaniel Kharbangar (8 & 84), Damewanshan Nengnong (39), Andystar Kharsati (46), Banlumlang Kharsyntiew (58), Pynshailang Kharsyntiew (67) bad u Eiller Chasterstar Allya (89). Katba ka Nongmensong ka la pynphai kylla shi kol lyngba u Rijied Rymbai (38) hashwa ba kan mad ïa ka jingshah rem.
Haba phai sha kawei pat ka jingïakhun, ka Tynring ka la lah ban thep kol lyngba u Nelsonroy Mynsong (29), Bakmenkordor Mylliem (70) bad ka la ïoh biang sa shi kol lyngba ka jingïarap pynthep da u rangïalehkai ka Jongksha ha ka minit kaba 74.
Kumba ka paw dei tang ki ar tylli ki kynhun na ki lai tylli ki group, lem bad ar tylli ki kynhun ki ban wan balai (best third-placed team) ki ban ïoh rung sha ka quarter finals. Te kumta ka Smit, ka don jingkyrmen ban ïoh rung namar ka don ha ka kyrdan balai bad ka jinglah ban thep kol bun.
Ha kawei pat ka liang ka Tynring ka la ïoh ban bat ïa ka kyrdan ba hakhlieh ha ka Group-C, hynrei ka lah ban shah knieh noh namar ka Lawsohtun (ba don ha ka kyrdan ba-ar) kan ïakynduh pyrshah ïa ka Umrynjah ha ka sngi Ba-ar ha ka por 1 baje mynsngi ha madan MFA, katba ka Sohïong ïa ka Sohryngkham ha ka por 12:30 mynsngi ha SSA Stadium.
