Shillong, Nailar 31
Ka kynhun ïalehkai siat suloi ka Jylla hapoh ka lama jong ka Shooting Association of Meghalaya (SAM) ka la lah ban pynpaw ïa ka jingtbit na ka bynta ban wan ha ka kyrdan ba-ar ha ka 13th North East Zone Shooting Cham -pionship 2026 kaba la sdang naduh 25 haduh 30 u Nailar ha Kahilipara Sports Shooting Range, 4th APBn Complex, Guwahati.
Haduh kaba kut jong kane ka lympung, kane ka kynhun ïalehkai ka Jylla ka la khur 37 tylli ki takma kiba kynthup ïa 13 tylli ki takma ksiar, 14 tylli ki takma rupa lem bad 10 tylli ki takma rnong.
Ïa ka nam lahduh la rah da ka Assam kaba la khur 80 tylli ki takma (39 ki ksiar, 21 ki rupa bad 20 ki rnong), katba ïa ka kyrdan ba lai la ïoh da ka Manipur kaba la khur 31 tylli ki takma ( 7 ki ksiar, 15 ki rupa lem bad 9 ki rnong).
Lah ban kdew ha u snem ba la lah, ka Meghalaya ka la bat ïa ka kyrdan balai da kaba ka la khur haduh 61 tylli ki takma (24 ki ksiar, 22 ki rupa lem bad 15 ki rnong).
Na ka liang ka synjuk ïalehkai jong ka SAM ka ai khublei kyrpang ïa baroh ki nongïalehkai, u coach, bad ki nongtrei ba shitrhem na ka bynta ban pynlong ïa kane ka jingjop.
Ka SAM ka don ïa ka jingangnud ban pynkhlaiñ ïa ka jingdon jaka ïalehkai jong kane ka jingïalehkai siat suloi bad ki lad ban ai jinghikai ha kylleng ka Jylla na ka bynta ban pynkhreh ïa ka 39th National Games 2027.
