Shillong, Nailur 01
Uwei na ki khlur ïalehkai karate ka Jylla u Gideon Tympuiñ u la pynpaw ka jingsngewkmen lyngba ka jingïoh khusnam na ka Sorkar Jylla ha ka jingrakhe ïa ka National Sports Day, kaba la long ha ka 29 tarik u Nailar 2026.
Kane ka jingpynkup burom ka long ban pynshlur ïa ki nongïalehkai ba kin nangtrei shitom shuh shuh nangne shakhmat watla ki la wanrah nam bad burom da kaba khur takma ha ki lympung ïalehkai jong u snem ba la lah (2025)
Haba ïakren bad u nongthoh khubor hadien ba la kut ka jingïalang pynkup burom, u Gideon u la pynpaw ba lyngba kane ka jingïoh khusnam na ka Sorkar Jylla, un ïaleh ban thied ïa ki tiar ïalehkai na ka bynta ïalade lem bad kiwei ki jingdonkam haba u leit shim bynta shabar.
U la pynpaw ïa ka jingkhmih lynti ba un ïai trei shitom nangne shakhmat namar ka jingangnud ka jong u ka long ban khur ïa ka takma ksiar ha ka Natioal Games kaba ban long ha u 2027 ha ka jylla Meghalaya.
Haba ïadei bad ka jingshah jied jong u ban mihkhmat ïa ka ri India ha ka kyrdan ïalehkai U-21 Men Kata jong ka AKF24 Cadet, Junior & U-21 Karate Championship 2026 ka ban long ha Amman Jordan, u Gideon u la pynpaw ba ka dei lyngba ka jingïoh khur ïa ka takma ksiar ha ka 5th KIO senior & U-21 National Karate Championships 2026 kaba la long ha New Delhi Lber mynta u snem 2026.
Ha kajuh ka por u la pynpaw ka jingsngewnguh ïa ki kmie ki kpa kiba la kyrshan ha kane ka jingïaid lynti ka jong ha kane ka kam ïalehkai. “Nga pynpaw ruh ka jingsngewnguh ïa ka synjuk ïalehkai jong ka All Meghalaya Karate-Do Association (AMKA) ha ryngkat ki coach kiba la trei shitom ban ai jinghikai ïa ngi naduh ba ngi dangrit kat haduh kane ka kyrdan.”
