Shillong, Nailur 01
Ka kynhun ïalehkai ka jylla Megha -laya ka la pynliem noh ïa ka Tamil Nadu da 2-1 kol na ka bynta ban khur ïa ka jingjop kaba nyngkong ha ka Group-C jong ka Junior Boys National Football Championship 2026-27 (Tier 1) na ka bynta ka Dr BC Roy Trophy, ha ka sngi Ba-ar ha Bengaluru.
Tang mar ïasdang ka jing-ïalehkai, u Adriel B Nongbet (4′) u la ïoh ban pynkhih jar na ka bynta ka Meghalaya. Kane ka la wan urlong hadien ba u la ïoh ban shut na kadiang da ka kjat kamon ha kaba u rangapkol ka Tamil Nadu um shym la lah ban khanglad na kane ka jingshah thep.
Hashwa ban kut artad ka jingïalehkai jong ka kylla step, ka Meghalaya ka la thep biang sa shi kol lyngba u Aiborlang Mulieh (45’+3) na ka bynta ban tam ar kol. Hadien katto katne por ba la bteng ïa ka kylla miet ka Tamil Nadu ka la pynphai kylla shi kol lyngba u Rohin G (73′). Haduh kaba kut kane ka kynhun kam shym la lah shuh ban pynphai bad ka la mad ïa ka jingshah rem.
Te kumta ka Meghalaya kan pynkhreh ïa ka jingïakhun kaba ar pyrshah ïa ka Maharashtra ha ka sngi Palei ha ka por 11 baje mynstep. Ka Maharashtra ka dei ka kynhun kaba la shah rem da 2-0 kol ha ka Mizoram hynne ka sngi.
Kat kum ka prokram, la ong ba tang kawei ka kynhun ka ban wan ha ka kyrdan ba hakhlieh ka ban ïoh rung sha ka semi final.
Ki kyrteng ki rangïalehkai ki long u Alvin Kharbani (GK), Shanborlang Khongjee, Franky Kharkrang, Samuel Malieh, Wallambok Thongni, Pyrkhatlang Marbaniang (sub Seibok Lyngdoh 61′), Andrew Kharsati (sub Mallenga N Sangma 90’+2), Aibannangkhraw Kharumnuid, Adriel B Nongbet (sub Kishan Wahlang 72′), Aiborlang Mulieh (sub Sannaky Nongsiej 61′) & Habankhlur Lyngdoh Mawnai.
