Shillong, Nailur 01
Ka jingpynkhreh na ka bynta ka 5th Sohra International Half Marathon 2026 ka dangïaid shaphrang hadien ba la lah ban pyndep ïa baroh ki jingdonkam na ka bynta kane ka jingïakop mareh kaba la ju pynlong manla u snem.
Na ka liang ki bor pynïaid ka Meghalaya State Olympic Association ha ryngkat ka jingïasnoh kti lang bad ka tnat ïalehkai ka Sorkar Jylla, ka la sdang ïa ka jingsam ïa ki t-shirt, bibs bad kiwei kiwei ha ka sngi Ba-ar sha baroh 1600 ngut ki nongshim bynta, katba ïa ki t-shirt ïa ki nongshim bynta kiba na ka thaiñ Sohra yn sam mynta ka sngi Balang naduh ka por 12 baje mynsngi bad ha ka 3 tarik na ka bynta ki skul ka thaiñ Sohra ha ka por 10 baje mynstep.
Ïa kane ka jingïakop mareh yn pynlong ha ka sngi Thohdieng (4 tarik) naduh ka por dangstep phyrngap. U kongsan ha katei ka sngi un dei u Myntri ka tnat ïalehkai u Bah Wailadmiki Shylla, katba uwei na ki khlur nongmareh ba paw jong ka ri u Sukant Singh Suki un long kum u nongshah khot sngewbha.
