Shillong, Nailur 01
U rangïalehkai ka Jylla, u Ricky Shabong u la shah kynthup hapoh ka kynhun ki 26 ngut ki rangïalehkai ki ban mihkhmat ïa ka ri India na ka bynta ki lai tylli ki jingïalehkai paralok bar ri ki ban long naduh mynta u bnai haduh u Risaw.
Ïa kane la pynbna da u Khalid Jamil (coach) ha ka sngi Ba-ar. Une u rangïalehkai shapdeng ka Jylla u la ïoh ban mihkhmat ha ka sien kaba nyngkong eh shabar ri ha ka Unity Cup kaba la long ha u Jymmang ha London ha kaba u la ïoh ban shim bynta ha ka jingïakhun pyrshah ïa ka Jamaica bad hadien ïa ka Zimbabwe.
Ka India kan pynkhreh ïa ki lai tylli ki jingïalehkai bar ri pyrshah ïa ki kynhun kiba don ha ki kyrdan ba kham shajrong, kata ïa ka Panama ha ka 26 tarik mynta u bnai ha Bengaluru hashwa ba kan ïakynduh ïa ka kynhun kaba la rah haduh san sien ha ka World Cup, ka Brazil ha ka 3 tarik u Risaw bad kumjuh ïa ka kynhun kaba la rah nam lahduh ar sien ha ka World Cup, ka Uruguay ha ka 6 tarik u Risaw ha Kolkata.
Kine ki lai tylli ki jingïalehkai khamtam pyrshah ïa ki kynhun kiba la bat teng ïa ka nam lahduh ha ka World Cup kin long ki jingïarap ïa ka India. Kine ki kynhun ki dei kiba la shim bynta ha ka FIFA World Cup, kaba la kut dangshen mynta u snem.
“Kane ka dei kaba kongsan bha na ka bynta jong ngi, da ki lai tylli ki jingïalehkai ki long ki jingtynjuh ïa ngi pyrshah ïa ki kynhun kiba la ïalehkai ha ka World Cup. Ka jingïakhun pyrshah ïa ka Brazil bad Uruguay kan long ha Kolkata, katba ka jingïakhun pyrshah ïa ka Panama kan long ha Bengaluru, kan long ka jingïarap na ka bynta ki nongïalehkai ba kin ïoh ïa ka jingshemphang ha ka rukom ïalehkai,” la pynpaw u Jamil.
Te kumta kane ka kynhun jong u Jamil kan pynkhreh ïa ka jingkilanmet ha ka 14 tarik mynta u bnai ha Bengaluru. Hadien ka jingïakhun pyrshah ïa ka Panama, ka India kan leit sha Kolkata ha ka 28 tarik mynta u bnai na ka bynta kitei ki ar tylli kiwei pat ki jingïalehkai.
