Shillong, Nailur 01
U rangïalehkai barim bad uba la san na ka shlem ai jinghikai jong ka Shillong Lajong FC, u Yohaan Benjamin u la pyndep ïa ka jingsoi soskular kaba ar snem bad ka kynhun ïalehkai jong ka Campeonato de Portugal (Série B), ka Guarda FC.
U Yohaan u la pynïasoh sha ka Lajong ha u snem 2022 ha ka rta kaba u dang 15 snem bad u la pynlut ïa kapor haduh lai sngi bad kane ka klob. Te kumta une u rangïalehkai u la mihkhmat na ka Shillong Lajong ha kiba bun ki lympung hashwa ba un ïakhlad lok noh ha u snem 2025 na ka bynta ban ïasoh sha ka kynhun ïalehkai kaba na Slovenia, ka NK Bravo.
Ha ka por ba u dangdon bad ka Lajong, u Yohaan u la ïoh ban shim bynta ha ka AIFF U-17 Elite Youth League, Reliance Football Development League (RFDL), Meghalaya State League bad ha ka Shillong Premier League, kiba la long ki jingïarap ban nangkyntiew ha ka kam ïalehkai jong u.
U la mihkhmat ïa ka ri India ha ka kyrdan ïalehkai U-19 jong ka SAFF U-19 Championship 2025. U la long u rangïalehkai ba nyngkong eh na India ban ïoh ïashim bynta ha ka UEFA Youth League.
Lyngba kane ka jingkiew ha ka kam ïalehkai jong u shaduh ka dewbah Europe ka la long ka jingsarong na ka bynta ka Shillong Lajong hi baroh kawei bad ka la ai ka jingkitbok ba un nangkiew shaphrang ha ka kam ïalehkai jong u.
