Shillong, Nailur 01
Ka Sports Authority of India (SAI) ka la jam sha ka final ha ka Junior Boys National Football Championship 2026-27 (Tier 2) na ka bynta ka Dr BC Roy Trophy, hadien ba ka la pynliem noh ïa ka Tripura da 7-1 kol ha ka sngi Ba-ar ha Narainpur, Chhattisgarh.
U Tongbram Marjesh Singh u la thep marwei haduh san kol bad u la ïohpdiang ïa ka nam Man of the Match.
Uwei na ki rangïalehkai ka Jylla uba dangdon hapoh ka jingshah pyntbit ha ka shlem ai jinghikai jong ka SAI Training Centre, Shillong, u Paulbious Tariang u la ïoh ban mihkhmat ha kane ka lympung bad u la ïalehkai ha ka bynta kaba shadien.
Ha kane ka jingïakhun semi final kaba nyngkong, u Tongbram u la thep ïa kitei ki san kol ha ka minit kaba 20′, 34′, 52′, 77′ & 86′, katba ïa kiwei pat la thep da u Yirampheu Ringdi (52′) bad u Hengoulen (88′). Na ka liang ka Tripura ka la pynphai kylla shi kol lyngba u Khomendra Reang (43′) hashwa ba kan mad ïa ka jingshah rem.
Te kumta ka SAI ka la thikna ba kan jam sha ka Tier 1 bad kan ïoh ban shim bynta naduh u snem ban wan.
