Shillong, Nailur 01
Ka Shillong Lajong FC ka la pynliem noh ïa ka Meghalaya Police F.T da 2-0 kol ha ka lympung ïalehkai Shillong Premier League 2026 kaba la long ha ka sngi Ba-ar ha SSA Stadium, Polo.
Ïa kine ki ar kol, ka Shillong Lajong ka la ïoh ban thep ha ki ar kylla jong ka jingïakhun ha kaba ka kol ba nyngkong la thep da u Ricky Kharkongor (39′) bad ka kol kaba ar la thep da u Lalmuansanga (54′) na ka bynta ban pynlong ïa ka Lajong ba kan jam shakhmat khlem pat shah rem ruh wat tang shisien mynta ka samoi, hynrei kan dei ka nam rem kaba nyngkong ïa ka MLP.
Ka jingïakhun ka long ba hapoh ki shiphew minit jong ka jingïakhun, la mih paw ka jingpyrshang ban pynkhih jar na u Freddy Jyrwa bad kum-juh na u Lalmuansanga, kaba la hap ban pynlong ïa u rangapkol ka MLP u Eve-ningstar Bareh ba un long uba phikir bad peitngor bha ïa la ka jong ka kol.
Ïa ka kol ba nyngkong ka Lajong ka la wan hadien ba u Lalmuansanga u la ïoh ban rah kham sha-khmat ïa ka bol bad ha ka khyllipmat ba biang bha ba un pyllait sha u Ricky na ka bynta ban khyrwit kham jam ïa ka bol.
Ha ka kylla step ka MLP ka la ïoh ïa ka kabu ksiar ba paka ba kan ïoh pynkhih jar lyngba u Aldrin Ramsiej uba la khyrwit jam bha ka bol, hynrei ka la her shabar ka dieng kol.
Marsien ïa sdang ka kylla miet, la mihpaw sa kawei ka kabu ksiar ïa ka MLP kaba la ïoh ban shut ïa ka free-kick ïa kaba la tur shakhmat ban shut da u Bikram Chetri, hynrei ka bol pat ka la kiew shalor bad poi pynban shabar jong ka kol.
Hadien kane, ka Lajong ka ïai bteng ba kan ñion borbah kaba plie lad ïa ki ba kin da ïoh syndon ban thep pat ïa ka kol kaba ar, ha kaba u Lalmuan-sanga u la lah ban sam lyngba ïa u Eveningstar bad ïoh ban pynkhih biang ïa ka jar.
Hadien kane, u Lalmuan -sanga ula dei ban ïoh ban thep kumba ar kol, ha kaba kawei na ki kabu ksiar ba la pynlehnohei ha ka penalty namar ka ‘foul’ u Bikram ha ka box, kaba hangne u Eveningstar u la lah ban kyrda na ka jingshah thep.
Ha kaba kut noh kane ka jingïakhun, ka Shillong Lajong ka kylla long ka kynhun ïalehkai ba nyngkong ba kan khur pura ïa ka 10 poiñ bad ban lamkhmat syndon ha kane ka lympung, katba ka MLP ka la hiar noh pat sha ka kyrdan kaba saw bad kamai 7 poiñ.
Ha ka Balang kin jingïalehkai kin don ar tylli ha kaba ka Laitkor kan ïakhun pyrshah ïa ka Langsning FC ha ka por 1 baje mynsngi, katba ha ka por 5 baje janmiet ka Nongkseh SSCC kan ïakhun pyrshah ïa ka Mawlai SC.
