Shillong, Nailur 02
U President jong ka Shil-long Cricket Association u Bah Peter Macdonald Kharsawian u la maham tyngeh ïa ki briew kiba ju mlien ban kynnoh manla ka por, ba ki dei ban sangeh noh shi syndon ïa kum kine namar ki long kiba khlem nongrim.
Haba ïakren bad ki nongthoh khubor ha ka sngi Balang, u Bah Kharsawian u la ong ba na ka liang ka synjuk ka la tip ïa ki katto katne ki kyrteng jong ki nongkynthoh ha ki kot khubor, ha kaba ïa mynta kim pat kwah ban ong eiei, hynrei u la ong ba shen ka SCA kan sa lum ïa ka jingïalang jong ka executive committee bad kaei ka sien jam kan shim nangne shakhmat.
Ha kaba ïadei bad ka jingshah kynnoh pynbor da ma u kum u nongïalam ka SCA ban phah soi jubor ïa ki rangïalehkai ha ka shithi kaba u la ïarap ban aiti ha ka por ba u ïakynduh ïa u Secretary jong ka BCCI u Devajit Saikia, myn ha ka 27 tarik u Nailar, u Bah Macdonald u kyntait ba na ka liang ka jong u um shym la leh don bor eiei ne ban phah soi jubor ïa ki 12 ngut ki rangïalehkai, hynrei u la ong ba ka dei ka mon jong ki rangïalehkai kiba la ïakynduh ïa ki jingeh ha ka jingïaid lynti jong ki ha ka kam ïalehkai kriket.
Kine ki jingeh jong ki nongïalehkai kriket ka dei ka jingbym treikam pura ka Meghalaya Cricket Association (MCA), ka jingbym biang ha ka rukom khot sha ka jingpyrshang ne ka ‘trial’ ha ka ban jied ïa ki nongïa-lehkai, kumjuh ki jingpynkhreh ïa ki kynhun ym kumba long ha ki aïom ba la lah bad kiwei kiwei.
“Ha ka jingshisha ha kaba nyngkong ki rangïalehkai ki la wan mih sha nga ban pynpaw halor ki jingeh ba ki ïakynduh. Te kumta nga la thoh ïa ka shithi ha ryngkat ka jingsoi jong ki hashwa ban phah sha u Secretary jong ka BCCI u Devajit Saikia, hynrei ngam shym la phah soi jubor ïa ki.”
“Ki rangïalehkai ba la ai kyrteng baroh ki don haduh 12 ngut, lait noh tang uwei, u Bijon Dey u khlem treh ban soi bad u la phet noh na madan. Ngim shym la phah wan soi ïa u namar kane ka dei ka mon ka jong ki nongïalehkai.”
Ha kawei pat ka liang na ka liang ki rangïalehkai ki la pynpaw ba kane ka jingsoi ka jong ki ka dei da la ka mon ka jong ki na ka bynta ka jingbit jingbiang jong ki ha ka kam ïalehkai bad kam shym la don ka jingshah pynbor kumba la kynthoh ha kawei na ki kot khubor. Ki la pynpaw ba kum ki rangïalehkai ki kwah ban ïashim bynta ha kane ka aïom ka ban wan bad kim don kano kano ka jingthmu ban pyrshah ne ban kyrshan ïano ïano.
Ki la pynshai ba hashwa ban soi ïa kane ka shithi, kum ki rangïaleh-kai ki la pule bniah ïa ka jingthoh ha ka shithi bad hadien kata ki sa shim ïa la ka bynta ban soi da ka mon sngewbha ïa katei ka shithi hashwa ban aiti sha u Secretary ka BCCI.
Ki rangïalehkai kiba la mih shakhmat ban soi kyrteng ha katei ka shithi ki kynthup ïa u Akash Kumar Choudhury, ba la long teng u kapten ka kynhun ïalehkai ka Jylla ha ka Syed Mustaq Ali 2025-26, u Kishan Lyngdoh ba la long teng kapten ka kynhun ïalehkai ha ka Ranji Trophy 2025-26, u Anish Chirak, Aryan Borah, Joydeepan Deb, Avinash Rai, Navin Kumar Ray, Rohit Kumar Yadav, Sudhir Sahani, Himan C Phukan, Ram Gurung ba long teng kum u Vice Captain ha ka Vijay Hazare 2025-26.
