Shillong, Nailur 03
Ka Sawmer SC ka la wanphai ban pynliem kylla ïa ka Nangkiew Irat da 2-1 kol ha ka lympung ïalehkai Shillong Premier League 2026 ha ka sngi Palei ha SSA Stadium, Polo.
Watla u Ronaldkydon L Nong-lait (38′) u la pynkhih jar nyngkong eh na ka bynta ka Nangkiew Irat, hynrei ka Sawmer ka la pynphai kylla ar kol ha ka kylla miet lyngba u Khrawkupar Tamu (70′) bad u Andy Mawthoh (75′).
Ha ka jingshisha ka Nangkiew Irat kaba la khur jingjop ha ki ar tylli ki jingïalehkai ba la lah, ka la khmih lynti ban khur ïa ka hat-trick. Kane ka kynhun ka la pynlehnohei ïa ki katto katne ki kabu ksiar bad rangapkol ka Sawmer u Pyrshang-banbha Dkhar u la pynlehnohei ban kem ïa ka bol kaba suk eh ba la shut da u Ronald.
Hynrei ka Sawmer ka la pyrshang ban ïalehkai bha ha ka kylla miet, ha kaba ka la lah ban pynïakhaid lyngba u Khrawkupar. Ha ka jingshisha u Wanshanlang Dkhar u la ïoh ïa ar tylli ki kabu ksiar na ka bynta ka Sawmer, hynrei ha ka minit kaba 76 u rangïalehkai shongben u Andy u la lah ban pynurlong ha ka ban thep ïa ka kol kaba ar.
Kane ka long ka sien kaba nyngkong ha ki hynriew tylli ki jingïalehkai ba la lah, ba ka kynhun ka ban wan beh nadien bad ban khur ïa ka jingjop. Te kumta ka Sawmer (6 poiñ) ka la kiew sha ka kyrdan ba hynriew, katba ka Nongkseh (4 poiñ) ka la hiar sha ka kyrdan ba hynñiew.
Ha kawei pat ka liang, ka jingshah rem ka la pynlong ïa ka Nangkiew Irat ban duh noh ïa ka kyrdan basaw ha ka Meghalaya Police. Watla ki la kamai mar 7 poiñ, hynrei kane ka jingshah rem ka la pynlong ïa ka Nangkiew ba kan shah tam noh ha ka MLP lyngba ka jingïapher ha ka jingthep kol.
Kane ka lympung ïalehkai jong ka SPL kan sangeh shwa mynta ka taïew bad kan bteng biang naduh 9 tarik mynta u bnai hapdeng ka Mylliem pyrshah ïa ka Shillong Lajong ha ka por 3:40 nohphai sngi.
