Shillong, Nailur 06
U khlur rangïakura barim ka Jylla bad uba dangbat kum u coach jong ka ri India, u Torak Kharpran u la shah jied ban don bynta kum uwei na ki coach na ka bynta ka 20th Asian Games 2026 ka ban long ha Aichi-Nagoya, Japan naduh 19 tarik mynta u bnai.
U Torak u la long uwei napdeng ki coach jong ka jingïalehkai ïakura, hadien ba ka tnat ïalehkai ka Sorkar Pdeng ka la mynjur dangshen ïa ki kyrteng 246 ngut ki ‘official’ bad ki nongïarap na ka bynta ka kynhun ïalehkai jong ka India, kaba don 503 ngut ki nongïalehkai ki ban shim bynta ha katei ka lympung.
Ha ka jingshisha ka tnad ka la mynjur nyngkong ïa 492 ngut ki nongïalehkai na ka bynta katei ka lympung, hynrei kumba la khmih lynti, la pynrung katto katne ki kyrteng khamtam ha ka kynhun ïalehkai.
Haba kheiñ kyllum ka jingdon ki nongïalehkai ka long 768 ngut, kynthup ïa 19 ngut ki nongtrei bad u Sahdev Yadav u la long kum u chef de mission u bad u Dr. Dinshaw Pardiwala kum u chief medical officer.
Kane ka kynhun kan leit shim bynta khlem u khlur nongkawang sum u Neeraj Chopra uba la ngat ha ka jingmynsaw, hynrei yn bujli noh da u rangïalehkai ba dang 24 snem ka rta u Yashvir Singh.
Ki 31 ngut ki dkhot nongïarap ki kynthup ïa 20 ngut ki coach hapoh ka jingïalam u coach ba hakhlieh duh u P. Radhakrishnan.
Ha katei ka lympung ka ban kut ha ka 4 tarik u Risaw, ka India kan shim bynta ha ki 36 tylli ki jingïalehkai kiba kynthup ïa ka Aquatics, Archery, Athletics, Badminton, Boxing, Kaya-king & Canoeing, Cricket T20, Cycling, Equestrian, E Sports, Fencing, Golf, Artistic Gymnastics, Hockey, Judo, Kabaddi, Karate, Kurash Mixed Martial Arts, Rowing, Rugby Sevens, Sailing, Sepaktakraw, Shooting, Sports Climbing, Soft Tennis, Squash, Surfing, Table Tennis, Taekwondo, Tennis, Teqball, Volleyball, Weightlifting, Wrestling bad Wushu.
