Shillong, Nailur 07
U President ka Langsning Football Club u Bah Banteidor Lyngdoh u la pynpaw ka jingsngewdom bad sngewbitar halor ka jingleh shilliang khmat ka Sorkar Jylla da kaba ai sngewbha ïa ka jaka ha New Shillong sha ka NorthEast United Football Club, katba ïa ki klob ka Jylla ne ki skul kiba wanrah nam kam shym la ai jaka eiei na ka bynta ban seng ïa ki shlem ai jinghikai kiba paka.
Haba ai jingkren ha ka jingïalang kitbok ïa ka kynhun ïalehkai Under-17, ka OM Roy Memorial Higher Secondary school ka ban mihkhmat ïa ka Jylla sha ka 65th Subroto Cup International Football Tournament 2026 ka ban long ha nongbah Delhi, ha ka 7 tarik u Nailur 2026, u Bah Banteidor uba long ruh u President ka Shillong Sports Association bad uba long ruh u MLA ka Mawkynrew, u la ong ba lada ka sorkar ka lah ban ai haduh 28 akar sha ka NorthEast United, kan eh aiu ban ai tang kumba 4 lane 5 akar ïa ki skul kum ka OM Roy kaba la wanrah nam bad burom ïa ka Jylla ha ka International Subroto Cup ha u 2013, khnang ba kan ïoh ban seng ïa ka shlem ai jinghikai kaba paka na ka bynta ban saiñdur ïa ka lawei jong ki khynnah ha ka kam ïalehkai.
“Ngi ïohi ha ki rynsan social media ba u tyngshop ba paw nam ka ri India u John Abraham u la pynpaw ka jingai khublei ïa ka Sorkar Meghalaya, kaba la ai sngewbha haduh 28 akar ka jaka kaba ha New Shillong sha ka NorthEast United FC, ynnai ïakren ïa ka pisa ba ka Sorkar ka la theh sha kane ka kynhun ïalehkai Indian Super League.”
“Haba nga ïohi ïa katei ka 28 akar ka la pyndom bad pynbitar ïa nga. Ha ka jingshisha ka NorthEast United ka don tang uwei u rangïalehkai Khasi, hynrei balei ka theh haduh katne ïa katei ka klob. Nga tharai ka Sorkar ka la dei ban pyrkhat janai ba ïa ki skul kiba leh bha kum ka OM Roy ka la dei ban ai sngwbha la kumno kumno 4 lane 5 akar ka jaka, khnang ba kan nanglah ban sei ïa ki nongïalehkai kiba paw,” u la bynrap.
Ha kajuh ka por u la ai jing-ïaroh ïa ka skul O.M Roy kaba la sei ïa bun bah ki nongïalehkai phutbol kiba paw ka Jylla ha kaba don na ki kiba la ïalehkai ha ka Shillong League jong ka Shillong Sports Association ha Polo bad don ruh kiba la shongthait na ka kam ïalehkai.
