Jowai, Nailur 07
Ka hat-trick ba la ïoh da u Eban-skhem Nongtdeh ka la biang pura ïa ka Mainroad Nartiang SC ba kan pynliem noh ïa ka Umladang Shiparalok FC da 5-1 kol bad ban khur ïa ka jingjop ha ka lympung ïalehkai 2nd Division Football Tournament ba la pynïaid da ka Thadlaskeiñ Sports Association (TSA) ha ka lah sngi U Blei.
Ha kane ka jingïalehkai kaba la long ha madan Multi Sports Complex kaba ha Wahïajer, u Ebanskhem Nongtdeh ula thep marwei haduh saw kol ha ka minit kaba 13, 21, 35 & 65 ha kaba la bynrap lang sa u Pele Dkhar (35). Katba ïa ka kol jong ka Umladang Shiparalok la thep da u Ribha Myrboh (68) hashwa ba kan mad ïa ka jingshah rem.
Ha kawei pat ka jingïalehkai, ka Lad Mukhla ka la pynliem noh ïa ka Maitchaphrang FC da 3-0 kol. Ïa kine la thep da u Edison Challam ha ka minit kaba 7. Kane ka kynhun ka la ïoh ei sa shi kol lyngba ka jingthep bakla u Ïohkmenlang Mukhim (23) bad ïa kawei pat la thep da u Phalangki Sumer (57).
Haba phai sha kawei pat ka jingïalehkai hapdeng ka Laru SC bad Moobakhon Tyllilang FC ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
