Jowai, Nailur 07
U Bah EMH Passah ula shah jied biang kum u Working President jong ka West Jaiñtia District Sports Asso-ciation (WJDSA), katba u Bah Ryum T. Khonglah u la shah jied kum u General Secretary ba thymmai na ka bynta ka samoi treikam jong u snem 2026-2029
Ïa u Bah Passah la jied ha ka jingïalang ka Annual General Meeting kaba la long ha Kiang Nangbah Indoor Stadium kaba ha Ladthadlaboh Dongmihsngi, Jowai ha ka 1 tarik mynta u bnai.
Kiwei de ki nongkitkam ba thymmai jong ka WJDSA ki long u Vice-President u Bah T. Ram Phawa bad Bah Cheini Niangty, nangta ar ngut ki Joint Secretary kata u Bah Supply H. Dkhar bad Bah Monlang Nongtdu, katba ïa ka kam Treasurer la thung ïa u Dr. Tyrchainmitre Lipon.
Ïa ka kam Football Secretary la thung ïa u Amity Tongper, Assistant Football Secretary sha u Mayalang Lanong, Athletic Secretary u Marso Kyndait, Indoor Secretary Bah Arkiyo Passah, Archery Secretary Bah Heibor Pariat.
La thung ruh ïa ki ar ngut ki Auditor kata u Bah Orilan Shylla bad Bah R. Piky Suwer, katba ki dkhot ka Executive Council ki kynthup ïa u Bah Teddy Laloo, Freddy Lakiang, Chanki Lhuid, Famous Plain, Emonlang Lipon, Ram Kyndait bad Manbha Ryngkhlem.
Hashwa ïa kane na ka liang u General Secretary barim u Bah Lammat OO Laloo ula pynsngew ïa ka jingïalang ba khatduh kaba la long haka 27 tarik u Rymphang 2021, kumjuh ruh ki rukom pynïaid kam bad ka jinglut jingsep jong ka synjuk hapoh kitei ki snem treikam.
Katkum ka jingïalang jong ka Executive Council ba la long haka 5 tarik mynta u bnai la jied ïa u Bah Lammat-o- Laloo bad Bah Junemon Paswet kum ki adviser jong ka WJDSA.
