Shillong, Nailur 07
Ka Smit SC ka la long ka kynhun kaba lai ban rung sha ka semi final ha ka lympung ïalehkai 2nd Division Football League 2026 ba la pynïaid da ka Shillong Sports Association (SSA), hadien ba ka la wanphai ban pynliem ïa ka Lawsohtun SC da 2-1 kol ha ka lah sngi U Blei ha SSA Stadium, Polo.
Kane ka la wan lyngba u Pynshailang Kharsyntiew bad u Nathanial Kharbangar, kiba la lah ban pynphai hashwa ban wai artad ka jingïalehkai
Ha kane ka jingïakhun quarter final baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step. Hadien katto katne por ba la bteng ïa ka kylla miet ka Lawsohtun ka la pynkhih jar nyngkong eh lyngba u Siewdor ha ka minit kaba 79.
Watla ka Smit ka la shah thep, hynrei ka la pyrshang ban ïakhun tyngeh na ka bynta ban pynphai. Kane ka jingïai pyrshang ka la pynurlong ba kan thep kylla haduh ar kol hashwa ban wai artad lyngba u Pynshailang (90+2) bad u Nathanial (90+5) na ka bynta ban khur syndon ïa ka jingjop.
Kumba ka long mynta ki la don lai tylli ki kynhun kiba la rung sha ka semi final kiba kynthup ïa ka Sohryngkham, Mawpat bad ka Smit, katba kin ban ïaknieh rung ki long sa ka Madan S&CC bad ka Mawryngkneng SC, kiba la ïakhun ïa ka quarter final kaba khatduh ha ka sngi Ba-ar ha ka por 3:15 nohphai sngi.
Haba phai sha ka jingïaknieh lait hiar ne ka Bottom League, ka Jongksha SC ka la pynjem khnap haduh da 8-2 kol ïa ka Mawkriah West SC.
U Wallambok K Sahnoh u la khur ïa ka hat-trick hadien ba u la thep ha ka minit kaba 49, 68 & 82, kumjuh ïa ki ar kol la thep da u Bishar Nongspung (32 & 80) bad u Babianghok Mynsong (37 & 45) lem bad kawei da u Khrawbhalang Songthiang (55). Na ka liang ka Mawkriah West ka la pynphai kylla ar kol da u Dibarson Kharbudnah (28 & 58) hashwa ba kan mad ïa ka jingshah rem.
Ha ka jingïalehkai ba la lah jong kane ka jingïaknieh lait hiar, ka Jongksha SC ka la jop ruh ïa ka Lumshyiap SC da 8-1 kol.
