Shillong, Nailur 07
Ka Meghalaya Football Association (MFA) ka la thung ïa u H Standly (aka Stanley) Rozario kum u coach hashwa ban sdang ka 39th National Games 2027, ha kaba ka Jylla kan pynlong ïa kane ka lympung kaba heh jong ka ri.
U Rozario uba la long uba la don ka jingshemphang ha kane ka kam khamtam eh ha ka thaiñ shatei lammihngi. U la shimti kum u coach ka Shillong Lajong FC, kaba la rung nyngkong eh sha ka I-League ha ka aïom ïalehkai 2009-10 bad kumjuh ha ka Federation Cup, ha kaba ka Lajong ka la wan ha ka kyrdan ba-ar. Ha ki snem kiba bud u Rozario u la ïatreilang bad ka United Sikkim FC bad ka Aizawl FC.
U Standly uba la bat ïa ka kyrdan AFC Pro Licence, u la long ruh u coach jong ka East Bengal, Mohun Bagan bad Salgaocar, nalor kiwei pat ki klob ba paw, kumjuh ruh ïa ka kynhun jong ki shipai (Services). Hapdeng u snem 2006 bad 2008 u la long ruh u la long ruh kum u Assistant Coach jong ka kynhun ki rangïalehkai ka India hapoh ka jingïalam jong u Bob Houghton.
Na ka liang ka sorkar Meghalaya ka pynshlur ïa ki synjuk ïalehkai ba kin long kiba la pynkhreh bha na ka bynta ka National Games, da kaba la ai jingkyrshan lyngba ki jingtei ïa ki jaka ïalehkai, ki tiar ïalehkai, ki jingleit shim bynta shabar. Te kumta ka jingkyrmen ka long ba ka Jylla kan lah ban khur takma bad khamtam eh na ka jingïalehkai phutbol.
Kumba ka paw na ka liang ka MFA ka thrang eh ban wanrah ïa u coach uba don ka jingshemphang bad uba la mlien ha kane ka kam, uba lah ban ïatreilang bad ki nongïalehkai. Te kumta katei ka synjuk ka la mynjur ïa ka jingïateh kular bad u Stanley Rozario ha ryngkat ka jingpdiang burom ïa kane ka jingwanphai biang ka jong u sha kane ka nongbah.
