Shillong, Nailur 08
Ka Malki Sports Club ka la pyllait ïa ki sopti ne ki jersey ïalehkai hashwa ba kane ka klob kan sdang ïa ka jingïashim bynta ha ka lympung ïalehkai First Division Football League 2026 ban pynïaid da ka Shillong Sports Associa-tion (SSA) ha Polo.
Kane ka jingpyllait ïa ki jersey ïalehkai ka long na ka bynta ki jingïalehkai ha la ïing bad shabar (home and away) lem bad ki jersey na ka bynta u Coach, uba ïalam ïa kane ka kynhun.
Ha kane ka sngi la ïadon lang ka nongaibuit jong ka Sorkar Jylla ka Dr. M. Ampareen Lyngdoh bad kaba long ka MLA jong ka 16 East Shillong kum ka kongsan, kumjuh ka MDC Kong Deity Majaw kum ka symbud kongsan ha ryngkat ka jingïadon lang u Director ka tnat ïalehkai Bah Alertson Nongbri, Dr. Werlok Kharshiing, u Rang -bah Shnong ka Malki Bah P.K Sohtun, u MLA barim ka Mawlai Bah Embhah -lang Syiemlieh, ki nongïa-lehkai, ki dkhot nong-kitkam kane ka klob bad kiwei.
Kane ka kynhun kaba la shah pynhiar kyrdan noh na ka Shillong Premier League jong u snem 2025, kan hap ban ïakhun tyngeh ha ka lympung ïalehkai jong ka First Division mynta u snem khnang ba ka lah ban wanphai biang sha ka SPL.
Haba ai jingkren ha kane ka jingïalang kaba la long ha Hotel Heiga, ka Dr. Ampareen ka la pynpaw ka jingkyrmen ba kane ka kynhun kan lah ha ka ban ïalehkai bha khnang ba kan kiew sha ka thong. “Nga shaniah ha phi ki rangïalehkai ba phin lah shitom na ka bynta ban kyntiew biang ïa ka Malki SC sha ka kyrdan ïalehkai kaba hakhlieh duh.’
Kumba ka Woodland Hospital ka don ha u pud u sam jong ka Malki, kumta na ka liang katei ka nongmihkhmat ka la kyntu ïa u trai jong kane ka jaka sumar, u Dr. Werlok ba un ïarap lada jia ba ki rangïalehkai ki don hapdeng ki jingmynsaw.
“Ngim lah shuh ban ñiew ïa ki jingleh bha jong phi Dr. Kharshiing ïa ki jingnoh synñiang jong phi na ka bynta ka shnong Malki.”
Ka Dr. Ampareen ka la pynpaw ïa ka jinglong la kloi ba kan wan ai jingkyrshan ïa kane ka kynhun ka ban ïakhun nyngkong eh ha ka 16 tarik mynta u bnai pyrshah ïa ka Nongkrem ha ka SSA Stadium, Polo. “Ma ngi baroh lang kum ki dkhot bad ki nongshong shnong ngin ïaleit na ka por sha ka por ban ai mynsiem ïa ka kynhun haba don jingïalehkai ha Polo.”
Ha kawei pat ka liang ka Kong Deity ka la pynpaw ba ka Malki ha ki por kiba la leit ka long kaba paw bha bad ki nongshong shnong ki long kiba ïeit bha ïa kane ka klob. “Shisien haba don jingïa-lehkai ha Polo, ki paidbah nongshong shnong ki tuid lut sha Polo ban ai mynsiem ïa ka kynhun, hynrei mynta pat ka la sdang ban duna ha ka jingdon ki nongkyrshan.
Ka la kyntu ïa ki nongshong shnong ba kin mih biang ha kane ka kynti kaba mynta ban ai jingkyrshan ïa kane ka klob haba ka ïalehkai ka Polo khnang ba kan lah ban kynjoh sha ka thong. “Lada ngi leh ïa kano kano da ka mynsiem ka jing-sngewrit bad ka jingïa-burom iwei ïa iwei kan ym don jingeh ba ngin kiew sha ka thong.”
La ïoh ruh kiwei pat ki jingai jingkren na u Dr. Kharshiing, u Rangbah Shnong bad kiwei kiwei kiba la ai ka jingkitbok ïa kane ka klob ba kan ïalehkai khnang kan wanphai biang sha ka Shillong Premier League.
