Shillong, Nailur 08
Ka nongai buit jong ka Sorkar Jylla ka Dr. M. Ampareen Lyngdoh bad kaba long ruh ka MLA jong ka 16 East Shillong ka la takraiñ tyngeh ïa ka MDC Kong Deity Majaw kaba la kren halor ka jingbym don ïa ka Sports Policy ha ka Jylla.
Haba ka jingkren ha ka jingïalang pyllait jersey ïalehkai jong ka Malki Sports Club ha ka sngi Ba-ar, ka Kong Deity ka la pynpaw halor ka jingbym don ka Jylla ïa ka Sports Policy ka ban kyntiew ïa ki nongïalehkai. “Haba nga peit ha shnong ha thaw ki khynnah ki hap ban ïalehkai ha ki lynti ki surok namar kim ïoh lad ban ïalehkai ha ki madan bad kane ka pyni ïa ka jingbym don ïa ka Sports Policy ka ban kyntiew bad saiñ dur na ka bynta ka lawei jong ki khynnah.”
Katei ka MDC kaba long ruh ka khun jong u nongïalam barim jong ka Malki SC, ka la pynpaw ruh ka jingsngew bynñiaw halor ka jingbym don ki nongïalehkai na la shnong ki ban mihkhmat ïa kane ka klob ha madan Polo.
Na ka liang ka Dr. Ampareen ka la buh jingkylli kylla ba kumno ym don ïa ka Sports Policy ha ka Jylla. “Ka Sorkar ka la pynlut T. 40 klur ha ki 15 snem mynshwa na ka bynta ki kam ïalehkai sports, hynrei mynta kane ka Sorkar ka la pynlut haduh T. 840 klur na ka mang tyngka jong ka Jylla bad kane ka long beit thik na ka bynta ban pynleit jingmut ban kyntiew ha ki kam ïalehkai bapher bapher bad ki bai bam ne ki scholarship ba ki nongïalehkai ki la ïoh ki kren shai ïa kata.”
“I MDC i la leit noh, ha jingshisha i la dei ban sngap namar i ong bym don policy, hynrei ka policy ka don bad ka treikam. Wat mutdur ba ïa ka mang tyngka kaba la mang na ka bynta ki nongïalehkai yn thep noh sha ka pla jongno re jongno namar ka don ka jingïatip lem,” ka la bynrap.
“Haba ngi wan hangne ym dei ban ïa kawang ktieh ne ban ïakren kam saiñ pyrthei ïano re ïano. Haba phi la jied ïa ngi bad ngin leh ïa ka kamram.”
Katei ka MLA ka la ong, “Mynta ka sngi ngi dei ban ïakren ïa ka sports ym ban ïakren kam saiñ pyrthei bad ka jingkylli mynta ka long mano ban kyrshan ïa ka Malki Sports Club. “Kum ka nongmihkhmat ngan ym ïeh ïa kane ka klob namar nga don ïa ka jingangnud ba kan ïalehkai bha bad kan wanphai biang sha ka Shillong Premier League,” ka la bynrap.
