Shillong, Nailur 09
Ka All India Football Federation (AIFF) ka la pynthikna ba kan sdang noh ïa ka lympung ïalehkai Indian Football League (IFL) naduh 30 tarik u Risaw mynta u snem.
Kane ka la wan hadien ba ka Council jong ka Indian Football League (IFL) ka la shong jingïalang ha ka sngi Ba-ar ha Football House ha New Delhi lem bad ki nongmihkhmat jong ki 11 tylli ki klob ki ban shim bynta ha kane ka lympung mynta ka aïom ïalehkai 2025-26, kynthup ïa ka Shillong Lajong kaba la wan ba-ar ha ka aïom ba la lah.
Katei ka Council ka la mynjur ruh haduh lai ngut ki rangïalehkai kiba nabar ri ki ban mih madan ha ka lympung ïalehkai IFL.
Ka Council ka la pdiang ïa ka Nagaland bad ka Odisha kum ki jaka ïalehkai kiba thymmai na ka bynta kane ka aïom ïalehkai 2026-27 khnang ban nangpynïar shuh shuh ïa kane ka lympung ha kylleng jong ka ri.
Ka Nagaland United SC ka la soi ïa ka jingïateh soskular bad ka Aizawl FC ban pynkylla ïa ka hok ïalehkai ha ka IFL, katkum ka jingmynjur na ka AIFF. Ka Nagaland United ka dei ban pynlong ïa ki jingïalehkai ha la ïing ha Dimapur. Katba ka Samaleswari SC na Odisha, ka la ïoh ïa ka laisen ïalehkai jong ka Delhi FC bad rung sha ka IFL.
U Secretary General ka AIFF u M. Satyanarayan u la ong, “Ka la long ka jingïalang kaba sngewtynnad, bad ngi sngewkmen ba mynta la pynthikna ïa ki tarik thymmai na ka bynta ka samoi ïalehkai jong ka IFL. Ha ka samoi ba la dep, watla ka dei ka jingïalehkai kaba la pynkut noh, hynrei katei ka lympung ka la long kaba sngewtynnad, bad ki jingkheiñ jong ki nongpeitkai ki long kiba ai mynsiem shibun. Mynta ka kynti ngin pynlong biang ïa kane ka lympung ïalehkai ha la ïing bad shabar. Lyngba ka jingdon ki kynhun bad ki jaka ïalehkai kiba thymmai, kan long ka jingkyntiew ïa kane ka lympung.”
