Shillong, Nailur 09
Ka Manipur ka la ïoh ban bat biang ïa ka nam lahduh ha ka Junior Boys’ National Football Championship na ka bynta ka Dr BC Roy Trophy 2026-27 (Tier 1), hadien ba ka la lah ban pynliem noh ïa ka West Bengal da 3-1 kol ha ka jingïakhun final kaba la long ha ka sngi Balang ha Bengaluru Football Stadium.
Kane ka nam jop ka la wan urlong lyngba u Jogesh Singh Heikrujam (26′), Jenson Meitei Thiyam (39′) bad u Muskan 88′).
Kane ka jingïalehkai phainal ka la long kumjuh kumba long ha u snem ba la lah, ha kaba ka Manipur ka la pynliem ïa ka West Bengal da 3-0 kol ha Amritsar. Kane ka la long ruh kumjuh kumba long ha ka aïom ïalehkai 1999-00 ha Bengaluru, kaba la ka Manipur ka la jop ha ka ‘sudden death’ jong ka jingïalehkai extra time.
Lyngba kitei ki ar tylli ki jingjop, ka Manipur mynta ka la khur ïa ka nam lahduh haduh lai sien. Ka la long ruh ka kynhun ba nyngkong naduh ba ka Mizoram ka la lah ban pynurlong ha ka aïom ïalehkai 2019-20.
Ha kane ka jingïakhun final, ka Manipur ka la thep ar kol ha ka kylla step lyngba u Jogesh ha ka minit kaba 26 bad u Jenson ha ka minit kaba 39. U Muskan u la lah ban pynthikna ïa ka jingjop na ka bynta ka Manipur ar minit shwa ban wai. Hynrei u Debraj Das (52) u la lah ban pynphai kylla shi kol lyngba ka penalty na ka bynta ka West Bengal.
Kumba ka paw ka Manipur ka la lah ban ïalehkai bha naduh kaba sdang kane ka jingïalehkai bad kane ka la buh jingeh ïa ki rangïalehkai ‘dien ka West Bengal.
U kapten ka Manipur u Jogesh u la ïoh ban pynkhih jar nyngkong eh ha ka minit kaba 26 hadien ba u la shut ïa ka free-kick ha kaba u rangapkol ka West Bengal um shym la lah ban khanglad na ka jingshah thep.
Hadien shiteng kynta ka Manipur ka la thep biang ïa ka kol kaba ar lyngba u Thiyam Jenson Meitei na ka bynta ban tam da 2-0 kol ha ka kylla step.
Hynrei ka West Bengal ka la lah ban pynphai kylla shi kol hynñiew minit ba la bteng ïa ka kylla miet. Kane ka la wan hadien ba u rangïalehkai shapdeng ka Manipur u Lanchenba Khwairakpam u la pynur ïa u Ayush Rajak bad u kapten u Debraj Das u la lah ban thep lyngba ka penalty.
Lyngba kane ka shi kol ka West Bengal ka la pyrshang ban ïakhun tyngeh na ka bynta ban ïoh thep kol biang, hynrei ki rangïalehkai ‘dien ka Manipur ki la lah ban khanglad na ka jingshah thep.
Hashwa ban wai u rangïalehkai shongben ka Manipur u Muskan u la ïoh ban rah ïa ka bol hapoh ‘box’ bad u la ïoh ban thep kol na ka bynta ban pynlong ïa katei ka kynhun ban khur syndon ïa ka jingjop.
