Guwahati, Nailur:
Ki la don palat 11.38 lak ngut ki nongthep vote ha kylleng ki san tylli ki Assembly konstitwensi ha Nagaon distrik jong ka Assam kin ïoh ban thep vote ha ka elekshon shiteng samoi jong ka Nagaon Lok Sabha ka ban wan, ong u District Commissioner ba dang shu shah thung thymmai u Aranyak Saikia.
Haba kren sha ki nongthoh khubor halor ka jingpynkhreh elekshon jong ka distrik, u Saikia u la ong ba ki nongjied ki don 11,38,362 ngut ki nongthep vote.
Ban pynsuk ïa ka jingthep vote, ka Election Commission kan buh haduh 1,339 tylli ki jaka thep vote ha ki 684 tylli ki jaka ha baroh kawei ka distrik.
Kum shi bynta ban pynneh ïa ki lad jingïada, ki bor synshar distrik jong ka Nagaon bad Morigaon ki la bthah ïa ki nongshong shnong ba ki dei ban buh lut ïa ki tiar siat kiba ki don naduh ka lah sngi U Blei.
Yn buh ïa ki kyndon ba kyrpang na ka bynta ki briew kiba don jingduna ha ki dkhot met bad ki nongthep vote kiba la palat ïa ka 85 snem ka rta, kiba yn shah ban thep vote lyngba ka jaka thep vote ha la ïing.
Ki nongthep vote kiba dei hok kin ïoh ruh ban pyndonkam ïa ka hok jong ki lyngba ki Postal Ballot.
U Saikia u la ong ba 149 ngut ki ophisar na Nagaon distrik yn phah ïa ki kam ba ïadei bad ka elekshon hapoh ka Election Commission.
La thaw ruh ïa ka kamra peit bniah kaba kyrpang ban ïarap ïa ki nongthep vote bad ban jubab ïa ki jingkylli kiba ïadei bad ka elekshon.
Ar tylli ki kamra kiba khlaiñ yn thaw na ka bynta kane ka elekshon shiteng samoi, ha kaba kawei kan don ha ka skul jong ki khynnah shynrang jong ka sorkar Nagaon bad kawei pat kan don ha ka skul bah jong ka Dawson Higher Secondary and Multipurpose School.
Ka bor synshar distrik ka la ong ba baroh ki lad ki lynti ki dang buh ha ka jaka ban pynthikna ba ka elekshon shiteng samoi jong ka Nagaon Lok Sabha kan long kaba ïaid beit ïaid ryntih, kaba laitluid bad kaba hok.
