Shillong, Nailur 09
Ka O.M Roy Memorial Higher Secondary School kaba na East Khasi Hills ka la mih ha ka janmiet jong ka sngi Balang ban leit sha nongbah Delhi na ka bynta ban shim bynta ha ka 65th Subroto Cup International Football Tournament 2026.
Kane ka lympung ïalehkai jong ka Under-17 boys kan sdang naduh 15 haduh 24 tarik mynta u Nailur ha kaba yn wan ïakhun da ki skul kiba la khur ïa ki nam lahduh na ki jylla bapher bapher jong ka ri lem bad kawei ka kynhun kaba nabar ri.
Hashwa ba kane ka kynhun kan mih na ka nongbah Shillong, na ka liang u kapten u Name-shaphang Pdahkasiej lem bad u coach u Paila Remdor Syndor ki la pynpaw ba ki la long ba la pynkhreh bha bad ki la ïoh ruh ban shim bynta ha ki jingïalehkai paralok. Te kumta ka jingkhmih lynti ka jong ki ka long ba kin ïalehkai bha ha kane ka lympung kumba ki la lah ban pynpaw ïa ka jingtbit ha ka District Level ha ka State Level.
“Ngi la long ba la pynkhreh bha na ka bynta kane ka jingleit shim bynta sha Delhi. Kumba ngi la lah ban ïalehkai bha naduh ka District Level bad kumjuh ha ka State Level, ngi khmih lynti ba ngin ïalehkai bha ha katei ka lympung ka ban long ha Delhi bad ban burom ïa ka Jylla,” la pynpaw u Nameshaphang.
Ha kawei pat ka liang u Coach kane ka kynhun u la pynpaw ba kumba ki la pynkhreh bha na ka bynta kane ka lympung, ki khmih lynti ban kynjoh sha ka thong. “Ngi la ïoh ban shim bynta ha ki jingïalehkai paralok bad baroh ki rangïalehkai ki long kiba biang khlem don kino kino ki jingmynsaw.”
Watla ki don katto katne ki jingduna hapoh ka kynhun, hynrei kum u coach u la pynpaw ba la pynkhlaiñ ïa ka kynhun ba ha baroh ki bynta jong ka kynhun.
“Kumba ngi la lah ban rah ïa ka nam lahduh ha u snem 2013 ha nongbah Delhi, hynrei mynta ka kynti ngi khmih lynti ba ngin ïalehkai bha khnang ba ngin lah ban kynjoh sha ka thong,” la bynrap biang u Paila Remdor.
