Shillong, Nailur 09
Ka Mylliem SC ka la pynkylla khongpong ïa ka lympung ïalehkai Shillong Premier League 2026 ba la pynïaid da ka Shillong Sports Association, hadien ba ka la ïakhun tyngeh ban pynïakhaid mar 3-3 kol pyrshah ïa ka Shillong Lajong FC, ha ka sngi Balang ha SSA Stadium, Polo.
Da kane ka jingïakhaid, ka pynlong ïa ka Shillong Lajong FC ba kan bat ïa ka kyrdan ba hakhlieh duh jong ka miej ïakheiñ poiñ hadien ba ka la khur 11 poiñ bad tam da shi poiñ ïa ka Mawlai SC.
Katba na ka liang ka Mylliem, kan dei ka poiñ kaba nyngkong eh ba kan khur na kane ka lympung hadien ba ka la dep ba kan mad ïa ki saw tylli ki jingshah rem ha ki jingïakhun ba ka la dep shakhmat, bad kan dei ruh ka jingïakhun ba nyngkong ba ka Shillong Lajong ba kan shah thep ki kol ha kane ka samoi ïalehkai jong kane ka aïom.
Ka jingïakhun ka long ba ki ar kynhun ki la lah ban ïa tam kylla iwei ïa iwei, ha kaba ïa ki lai tylli ki kol ka Shilliong Lajong FC la thep da u Ïohborlang L. Lyngkhoi (7′), Lalmuansanga (65′) bad u Deibormame Tongper (76′).
Katba na ka liang ka Mylliem ka la thep lyngba u Wanpynshngaiñ Nongsteng (25′), Shaibor Nongrum (52′) bad u Istarbor Marngar (70′).
Ka jingïakhun ka kham i khluit bha ha ka kylla miet, ha kaba ka Mylliem, ka la ïeng ban ïakhun tyngeh bha, kaba khlem lah ban pynkyndit ïa ki rangïalehkai ka Lajong, kiba da kheiñ sting bad kumjuh ba la don ki katto katne ki kabu ksiar ba ki rangïalehkai jong ka, ki la pynlehnohei.
Nalor kata ki rangïalehkai ‘dien ka Mylliem kum u Wanpynshngaiñ bad u Milancy Khongstia, ki la trei shitom ban ïeng ban ïada bad phikir bha ïa la ka jong ka kut ïalehkai, kaba hangne ka la sdang ba kan tynjuh bor kylla ïa ki rangkynsai ka Lajong.
Nalor kata, ki rangïalehkai ka Mylliem ha kane ka kynti ki la hiar sha madan da ka jingangnud ban kamai poiñ ha kaba ki la lah shisha ban leh ïa kaba ki angnud bad ka la pynkylla ïa ka rukom ïalehkai.
Ha ka sngi Palei ka jingïalehkai kan long hapdeng ka Rangdajied United FC (kaba don ha ka kyrdan ba khyndai) kan ïakhun pyrshah ïa ka Laitkor SC (kaba wan ba phra) ha ka por 3:30 nohphai sngi.
