Shillong, Nailur 09
Ka Meghalaya Carrom Association (MCA) kan pynlong ïa ka jingïakop siat carrom ba la tip kum ka 24th Meghalaya Open State Ranking Carrom Cum Selection Tournament 2026 naduh 15 haduh 19 tarik mynta u bnai ha Jaïaw Laitdom, Shillong.
Ïa kane ka jingïakop yn phiah ha la ki jong ki kyrdan ïakop naduh ka jingïalehkai kynhun jong ki shynrang (Men Team Event), kumjuh ka jingïalehkai Singles, Doubles, Mixed Doubles, Veteran bad ka Junior jong ki shynrang bad kynthei.
U Secretary kane ka synjuk u Bah Ferdinand Nongkynrih ha ryngkat u Bah Banrapkurlang Wahlang, Vice President bad Kong Anita Kharkongor, Treasurer, haba ïakren bad ki nongthoh khubor ha ka sngi Balang, ki la pynpaw ba ka jingthmu jong kane ka lympung ka long ban jied ïa ki nongïalehkai kiba kynsai ki ban ïoh ka lad ban mihkhmat ïa ka Jylla sha ki lympung ïalehkai ki ban long ha kylleng jong ka ri.
“Te kumta ngi kyntu bad wer ïa ki nongïalehkai na kylleng ki district bad ki klob ba kin wan ïashim bynta ha katei ka lympung ka ban neh saw sngi lynter.”
U Bah Nongkynrih u la ïathuh ba la pynkhreh ïa ki khusnam na ka bynta baroh ki nongjop naduh ki jingïalehkai kynhun bad kumjuh ki jingïakhun para marwei.
