Shillong, Nailur 10
Ka dkhot jong ka NITI Aayog jong ka Sorkar Pdeng, ka Dr. Joram Aniya ha ka sngi Palei ka la wan jurip ïa ka Sports Authority of India (SAI) Training Centre, Shillong bad kane ka long hashwa ban wanrah ïa ka High Altitude Training Centre hapoh kane ka shlem ai jinghikai.
Ha kane ka jingwan jong ka sha kane ka nongbah, la ïadon lang u Director ka tnat ïalehkai ka Sorkar Jylla u Bah Alertson Nongbri, kumjuh u Deputy Director Bah P.B War Nongbri, ki nongtrei ka SAI, ki coach lem bad ki khynnah.
Ha kane ka jingwan jngoh ïa katei ka shlem ai jinghikai, ka Dr. Joram ka la ïoh ban pynkut por kumba 2 kynta ban leit jurip ïa ki 3 tylli ki madan ïalehkai phutbol, athletics bad archery, kumjuh ka jaka ïalehkai karate, sepaktakraw, judo, boxing, ka jaka ïalehkai gym. Ka la ïoh ruh ban ïakren ryngkat ka jingkhublei ïa ki khynnah ïalehkai.
Haba ïakren bad ki nongthoh khubor, ka Dr. Joram ka la ong ba ka la wan jong ka sha kane ka nongbah Shillong ka long ban peit bad ban bishar bniah shaphang ka jingroi bad ka jingkiew kane ka Jylla ha ki kam ïalehkai. Ka la ong ruh ba ka jingwan jngoh jong ka ïa ka SAI Training Centre ka long ban bishar bniah ïa ki jingtei bad baroh ki jingdonkam jong ka ryngkat ban nangkham pynbha shuh shuh ïa ka.
Kumba ka Meghalaya kan pynlong ïa ka 39th National Games ha u snem 2027, ka Dr. Joram ka la ong ba ka jingwan jong ka sha kane ka nongbah ka long ruh halor ka jingpynkhreh ïa katei ka lympung baheh jong ka ri.
