Jowai, Nailur 10
Ka Mainroad SC Wahïajer, Mukhla Sohshrieh ki la khur jingjop ha ka lympung ïalehkai 2nd Division ba la pynïaid da ka Thadlaskeiñ Sports Association hadien ba ki la khur jingjop ha ka sngi Palei.
Ha kane ka jingïakhun kaba la long ha Multi Sports Complex Wahïajer, ka Mainroad SC Wahïajer ka la pynliem noh ïa ka Maya SC Wahïajer da 3-2 kol.
U Chilangmitre Laloo ula khyrwit da ka hat-trick na ka bynta ka Mainroad ha kaba u la ïoh ban thep ha ka minit 14, 58 & 60. Katba Maya SC Wahïajer ka la ïoh ban thep lyngba u Ïaid Pale (28) bad u Bunki Lyngdoh (68).
Ha ka jingïalehkai kaba bud, ka Mukhla Sohshrieh SC ka la jop da 3-1 kol ïa ka Tympang SC Wahïajer.
Ïa ki kol jong ka Mukhla Sohshrieh la thep da u Elbious Sari ha ka minit kaba 63, kumjuh u Odawan Lyngdoh (67) bad u Aimson Sari (69). Na ka liang ka Tympang SC Wahïajer ka la pynphai kylla shi kol lyngba u Pynsuk Shylla (27).
Haba phai sa kawei pat jingïalehkai hapdeng ka Goodwill Mupliang bad RC Dreaming Mupliang ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
