Agartala, Nailur:
Ki la don baroh kumba 10,889 tylli ki kot thep kyrteng kiba la thep da ki 10,889 ngut ki kyrtong na ka bynta ka elekshon komiti shnong ban wan hapoh ka Tripura Tribal Areas Autonomous District Council (TTAADC) kiba la shem ba ki long kiba biang hadien ka jingbishar bniah, ong ka Tripura State Election Commission (SEC) ha ka sngi Palei.
Ïa ka elekshon komiti shnong la buh ban long ha ka 28 tarik u Nailur bad ka jingthep kyrteng ka la sdang naduh ka 1 tarik u Nailur bad ka la bteng haduh ka 8 tarik u Nailur.
Katkum ka jingkheiñ jong ka SEC, la ïoh pdiang haduh 10,958 tylli ki kot thep kyrteng na ki 10,936 ngut ki kyrtong haduh ka por ba la buh.
Hadien ka jingpeit bniah ba la pynlong ha baroh ki block ha ka sngi Balang, la pynbna ba 10,889 tylli ki jingai kyrteng ki long kiba biang.
Na ki jingthep kyrteng kiba biang, ka Tipra Motha Party ka dei kaba bun eh kaba don 4,361 ngut ki kyrtong, bud sa ka CPI(M) kaba don 2,456 ngut, ka BJP kaba don 1,971 ngut, ka Congress kaba don 465 ngut, ka IPFT kaba don 483 ngut, ka CPI kaba don saw ngut bad 1,149 ngut kiba hap hapoh ka kyrdan “Others”.
Ka tarik ba khatduh ban weng ïa ka jinglong kyrtong la buh ha ka 11 tarik u Nailur, kata mynta ka sngi.
UElection Commissioner jong ka jylla u P.K. Chakraborty u la ong ba ka jingpeit bniah ka la sdang naduh ka por 11 baje mynstep jong ka sngi Balang ha baroh ki block bad ka Commission ka dang shim ïa baroh ki lad ki lynti ban pynthikna ïa ka elekshon kaba laitluid, kaba hok bad kaba suk.
“Ngi la ïakynduh arsien ïa u DGP-in-Charge u G.S. Rao bad wad ban buh ïa ki briew jong ka CAPF. Ngi la kyrpad ruh ïa ka sorkar jylla, kaba la rah ïa kane ka kam sha ka tnad kam pohïing ka sorkar pdeng,” ong u Chakraborty.
U la ïathuh ba 74 tylli ki kompeni jong ki pulit ka Central Armed Police Forces (CAPF) la shah pynjari na ka bynta ban ïada ïa ka elekshon. Na kine, ki don 24 tylli ki kompeni kiba la don lypa ha Tripura, katba ki briew kiba dang sah kin poi na shabar ka jylla bha shwa ka sngi thep vote.
Ka SEC ka dang buddien ïa ki jaka kiba donkam bad ka la thmu ïa ki lad jingïada kiba bun jait, kynthup ïa ka jingsynshar jong ki pulit, ka jingbuh ïa ki nongkhmih bniah ha ki kam elekshon bad ki ophisar jong ka tnad, bad ka jingpynkhlaiñ ïa ka jingpahara ha kano kano ka jaka kaba donkam.
U Chakraborty u la ong ba ka Commission ka dang pynneh ïa ka jingïatreilang kaba jan bad ki pulit bad kiwei kiwei ki heh kiba don bynta ban pynthikna ïa ka jingthep vote kaba suk ha kylleng ki jaka jong ka TTAADC.
Halor ki jingkynnoh ba ki don ki riew shimet kiba la shah khanglad ban thep kyrteng, u heh elekshon ka jylla u la ong ba ym shym la pyntip paidbah ïa kum kane ka jingjia.
Hynrei u la ong ba hangno hangno ba ki kyrtong ki la pynpaw ïa kum kine ki jingkynnoh, hadien la shah ïa ki ban aiti ïa ki kot ki sla jong ki.
