Shillong, Nailur 10
Ka Rangdajied United FC ka la wanphai da ka jingjop ha ka lympung ïalehkai Shillong Premier League 2026, hadien ba ka la lah ban pynliem ïa ka Laitkor SC da 3-1 ha ka sngi Palei ha SSA Stadium.
Marsien ïa sdang ka jingïakhun, dei ka Laitkor SC kaba la lah ban ïalehkai bha ha kaba ka la ïoh ban pynkhih jar nyngkong eh lyngba u Hamingbert Nongbet ha ka minit kaba 32.
Hynrei na ka bynta kane ka jingïakhun ba mynta ka sngi, ka Rangdajied United FC kam lah satia ban shu ïa peiñ tang da ka jingshah rem ne ïakhaid, hynrei kaei ba ki donkam ka long ban khur ïa ka jingjop.
Kumta wat hadien ba la shah tam shwa shakhmat da shi kol, katei ka kynhun ka la pyrshang suki pa suki katba nangjam shaphrang ka jingïakhun, ha kaba ki la lah ruh ban tehlakam ïa ka rukom ïalehkai jong ki.
Haba wan ban bteng ïa ka kylla miet, ki rangïaleh -kai ka Rangdajied ki la sdang ban ïohi ïa ki jingduna ka Laitkor SC, kumta ki la sdang ban ïakhun tyngeh ha kaba ka la lah ban pynïakhaid kylla lyngba u Franky Dkhar ha ka minit kaba 53. Kane ka kynhun ka la thep biang sa ar kol hashwa ban wai lyngba u Mebannangkiew Thabah (73′) bad u Pasborlang Khonglikong (88′) na ka bynta ban khur ïa ka jingjop.
Da kane ka jingjop, ka Rangdajied ka la lah ban pyllait ïalade na u lain jong ka jingma (relegation zone) na ka bynta ban jam sha ka kyrdan ba hynñiew, ha kaba ka la knieh noh ïa katei ka kyrdan na ka Nongkseh SSCC, kaba la hiar sha kaba phra bad ka Laitkor SC kan hiar sha ka kyrdan ba khyndai.
Haba ïadei bad kane ka jingjop, u rangapkol ka Rangdajied u Meshan u la long uba kynsai ha kane ka jingïakhun da kaba u la lah ban ïeng ban kyrda (save) na ka bynta ban pyllait na ka jingshah thep.
Ha ka sngi Thohdieng ka jingïakhun kan long hapdeng ka Nongkseh SSCC pyrshah ïa ka MLP FT ha ka por 3:30 nohphai sngi. Te kumta ka Nong-kseh ka donkam ban ïakhun tyngeh khnang ba kan lah ban pynskhem ïa lade ba kan dangsah ha kane ka lympung.
