Itanagar, Nailur:
Ki pulit jong ka Arunachal Pradesh, ki la sdang ïa ka jingtohkit, halor ki jingkynnoh, ba la pyndonkam da ki dawai, ban pynih jubor ïa ka kait, ha Naharlagun, ha kaba ki bor pynïaid, ki la sdang ïa ka jingtohkit jong ka aiñ, hadien ba ka video, kaba pynpaw ïa kane ka kam, kaba la kynnoh, ka la paw ha ki Social Media.
U heh pulit jong ka Naharlagun-Itanagar, u Nyelam Nega, u la ong ba kane ka kam ka la poi sha ka jingtip jong ki bor pynïaid ha ka sngi Ba-ar hadien ka jingpynphriang ïa kane ka video.
Haba leh halor katei ka jingujor, u ophisar ba dei peit ïa ka thanat Naharlagun u K Dev u la ujor da ka ejahar ha ka sngi Balang katkum ki kyndon ba ïadei jong ka Bharatiya Nyaya Sanhita (BNS) bad ka Food Safety and Standards Act, 2006.
“Ka jinglong thikna bad ka jinglong jong ki dawai kiba la pyni ha ka video ki dang sahkut, bad yn sa tip lyngba ka jingpeit bniah jong ki stad saïan bad ka jingtohkit kaba bniah”, la ong u Nega.
Ki pulit ki dang eksamin ïa katei ka mar kaba la kynnoh ba la pyni ha katei ka video ban tip la ka dei kaba la pyndonkam na ka bynta ban pynieh ïa ka kait bad la ka jingpyndonkam ïa ka ka la pynkheiñ ne em ïa ki kyndon jong ka jingkoit jingkhiah jong ki jingbam.
U Nega u la ong ba kano kano ka jingpynkheiñ ïa ki aiñ ba ïadei bad ka jingbam yn sa leh da kaba pyrkhing katkum ka aiñ.
Ka jingtohkit kan wad ruh ban lap ïa ki briew kiba donkti ha katei ka kam ba la kynnoh bad ban pynthikna ïa ki jingjia kiba don sawdong jong ka jingpyndonkam ïa utei u jait dawai.
La khmih lynti ba ki bor pynïaid kin shaniah ha ka jingpeit bniah jong ki stad saïan bad kiwei kiwei ki sakhi ban tip ïa ka jinglong jong utei u dawai bad ban pynshisha la ki jingkynnoh ki long kiba shisha ne em.
