Shillong, Nailur 11
Hadien ka jinghap ban mad ïa ki soh ba kthang na ki jingïakhun ba la dep, ka kynhun ïalehkai ka Nongkseh SSCC ka la khie khlieh biang sa shisien tad haduh ba kan da lah ba kan pynliem syndon da 7-1 kol ïa ka MLP FT ha ka lympung ïalehkai jong ka Shillong Premier League 2026, ba la pynlong ïa ka da ka Shillong Sports Association, ha SSA Stadium, Polo, hynne ka sngi.
Ban shu bynrap hangne, ba na kane ka jingïakhun ba mynta ka sngi, ka Nongkseh SSCC kaei kaba ka donkam ka long beit ïa ka jingjop kum shi bynta ba kan buh ïalade hapdeng ka thong jong ka jingïakhun ban ïaknieh rah ïa ka nam kum ka lahduh.
Kumta haba la hiar bha ka rukom ïalehkai hadien ba la dep ban ïakhun ha ka lympung ka Durand Cup 2026, hynne ka sngi, napdeng kine ki 7 tylli ki kol, saw tylli na kine kidei kiba la lah ban lam khmat da u kapten u jong ka u Hardy Cliff Nongbri (6 min, 12min, 55min bad 87min). Katba ïa ki kol kiba sah la ïoh ban thep ïa ki da u Kitboklang Pale (42min), Shano Tariang (61 min) bad u Aenam Graffenberg Jyrwa (65 min).
Katba ïa ka shi kol ban lait brut ka MLP FT la thep ïa ka da u Bisharlang Kharumnuid (78 min).
Kumta da kane ka jingmih na ka jingïalehkai ba mynta ka sngi, ka pynlong ïa ka Nongskeh SSCC ba kan kiew ruh syndon kham shalor jong ka miej ïakhein poiñ, hadien ba ka la ïoh ba kan khur 7 poiñ bad ka ‘goal difference’ ka jong ka kaba long +5 bad don ha ka kyrdan kaba saw, katba ka Nangkiew Irat (-1) kan ïaineh ha ka kyrdan kaba san katba ka MLP FT (-5) da kane ka nam rem ba mynta ka sngi ka hiar pat sha ka kyrdan ba 6.
Lashai ka sngi ka jingïakhun jong kane ka lympung kan long hapdeng ka Shillong Lajong FC pyrshah ïa ka Sawmer SC, kaban long ha ka por 3:00 baje nohphai sngi.
