Imphal, Nailur:
Ki pulit ka Manipur bad ki heh jong ka tnad Social Welfare jong ka jylla ki la pyllait im ïa kawei ka khynnah kynthei kaba dang rit ka rta bad kem ïa lai ngut ki briew ha ka jingkhynra mynstep ha Imphal East district ha ka sngi Palei. Uwei pat u suba uba saw u la lait phet bad u dang phetrieh haduh mynta.
Ïa kane ka jingkhynra la pynlong ha ka shnong Keibi hadien ba ki heh sorkar ki la ïoh jingtip ha ka miet jong ka sngi Balang ba la kynnoh ba ki don katto katne ki khynnah kynthei kiba dang rit ka rta kiba la pynkhreh ban khaïi shabar ka jylla.
U Director ka Manipur Social Welfare u Sheikh Abdul Hakim u la ong ha ka jingïalang bad ki lad pathai khubor ha ka janmiet jong ka sngi Palei ba ma u hi u la ïashim bynta ha kane ka jingkhynra. U la ong ba ki heh sorkar ki la ïoh jingtip halor katei ka jingthmu khaïi briew ba la kynnoh ha ka por kumba 11:00 baje mynstep jong ka sngi Balang.
Da kaba shim ïa ka jingkyrkieh, ki heh sorkar ki la pan jingmynjur mardor na ki nongïalam jong ka jylla. “Da kaba leh katkum ki jingtip na ki tyllong khubor bapher bapher, la pynbeit stet ïa ka jingtreikam bad la pynkut noh da ka jingmynjur beit jong u Myntri Rangbah ka jylla u Yumnam Khemchand Singh bad ki heh pulit bahakhlieh duh,” ong u Hakim.
Hadien ka jingmynjur jong u Myntri Rangbah ka jylla, la thaw ïa ka kynhun ba ïatreilang ryngkat bad ka jingïarap na ki pulit jong ka Imphal East bad ka kynhun ki pulit kynthei jong ka Imphal East.
Ha ka jingkhynra ha ka shnong Keibi, ka kynhun ka la pyllait im ïa katei ka khynnah kynthei kaba dang rit ka rta bad kem ïa lai ngut ki nongkhaïi briew.Ki bor pynïaid ki la pynlong ïa ka jingthwet ïa u nongkhaïi uba saw uba la lait phet ha ka por ba pynlong ïa ka jingkhynra.
Ïa ka jinglong jong u khynnah rit ba la pyllait im bad ki briew ba la shah kem ym shym la pynpaw ban ïada ïa ka jinglong kyrpang jong ka longrynïeng bad ka jingtohkit kaba dang ïaid shakhmat.
Ki pulit ki la ong ba ka jingtohkit kaba kham bniah ka dang ïaid shakhmat ban tip ïa ka jingheh jong ka jingkynnoh khaïi briew bad ban ithuh ïa ki jingïadei kiba lah ban don bad ki jingïadei kiba kham heh hapdeng ki jylla.
