Guwahati, Nailur:
Ka Bharatiya Janata Party (BJP) ka la jied ïa u Debasish Sharma kum u kyrtong jong ka ban ïakhun ïa ka elekshon shiteng samoi ka Lok Sabha ha Nagaon konstitwensi jong ka Assam.
Ka Central Election Committee jong ka BJP, ka la mynjur ïa ka jingïeng kyrtong jong u Sharma, na ka konstitwensi 09-Nagaon, katkum ka jingpynbna, kaba la pynmih da ka ophis pdeng jong ka seng ha New Delhi, ha ka sngi Thohdieng, 11 tarik Nailur.
U Debashis Sarma, u District Commissioner barim jong ka Nagaon bad ki nongthoh khubor u Lenin Saurav Bora bad ka Gunjan Kalita ki la pynïasoh ïalade sha ka Bharatiya Janata Party (BJP) ha ka sngi Ba-ar. Ka elekshon shiteng samoi ka long ha ka 6 tarik u Risaw, bad yn ñiew ïa ki vote ha ka 9 tarik u Risaw.
U Pradyut Bordoloi u la pyllait ïa ka shuki Nagaon hadien ba u la mih noh na ka Congress bad pynïasoh ïalade sha ka BJP. U la jop ïa katei ka shuki da ka tiket Congress ha ka elekshon Lok Sabha jong u snem 2024 bad hadien u la jop ïa ka shuki Dispur ha ka jingthep vote jong ka ïingdorbar thawaiñ kaba dang shen.
Ka jingpynkhreh elekshon ruh ka dang ïaid shakhmat ha Nagaon distrik, ha kaba palat 11.38 lak ngut ki nongthep vote ha kylleng ki san tylli ki Assembly konstitwensi ki dei hok ban thep vote. Kane ka distrik kan don haduh 1,339 tylli ki jaka thep vote ha ki 684 tylli ki jaka.
