Shillong, Nailur 11
Ka jingim ka jong u briew ka donkam ïa ka koit ka khiah, ha kaba khlem ma ka, ka long kaba lehnohei, hynrei na ka liang ka True North, ka shim ïa ka kabu ban pynlong ïa ki briew ba kin im sngi ha ki kam kilan met, ha kaba kawei ka kam ïa kilan dei ka kam jngi.
Kumta ban pynmlien naduh ba dang rit ne wat haduh ba la san la rangbah ka True North ka shim ha ka ïa ka sienjam ba kan da pynlong syndon da ka ïakob jngi ba la tip ïa ka kum ka 1st True North Open Swimming Competition and Masters Meet 2026, ha pung jngi jong ka, ba don ha Lapalang.
Ïa kane ka jingïakob kaba ar sngi la sdang ïa ka naduh mynta ka sngi naduh ka por mynstep, ha kaba la shem bad ïohi ba ki nongwan ban ïashim bynta ka kynthup naduh ki khynnah kiba dang rit wat haduh ki longkmie ki longkpa.
Ban nang pynshlur bad ai mynsiem shuh-shuh ïa la ki khun ki kti bad ki samla, ka la don ruh ka jingpynïakob jngi wat ïa ki longkmie ki longkpa, kaba pynshongkun bha ïa kane ka jingïakob.
Ha kane ka sienjam ba nyngkong la don ym duna ïa 200 ngut ki nongwan ïashim bynta, ha kaba la phiah ne bynta ïa ki ha ki kyrdan ne ki rta ïalehkai bapher-bapher.
Ïa ka jingïakob la sdang naduh ka rta jong ki Junior (I-VI) bad ka ïaid ter-ter shduh ka kyrdan kiba la heh (Senior) bad haduh ka kyrdan ba la tbit bha (Master).
Ia ka jingïakob jngi la pynlong ha ka kyrdan ïakhun jong ka Freestyle, Backstroke, Butterfly, Medley bad Relay.
Ha ka janmiet ba pynkut ïa ka sngi ba nyngkong, u kongsan ba la wan ban ïadon lang dei u Bah Dangsan Khyriem (MPS) ba dei ruh u SP City ryngkat bad u ‘rang ïalehkai phutbol ba la paw bha ka Shillong Lajong FC u Phrangki Buam, nalor kata la wan ruh ban sakhi lang da u Swimming Coach ka Meghalaya Swimming Association.
Ha kane ka janmiet la lah ban pynkut ïa ka sngi da ka jingsam ïa ki takma sha ki nongjop ha ki jingïakhun ba la pynlong ha ka sngi kaba
nyngkong.
