Shillong, Nailur 11
Ha ka jingïalehkai kaba la long ha ka Sngi Palei, 10 Nailur 2026 ha ka por 8 baje janmiet ha madan Dubai International Cricket Stadium kaba don ha ka nongbah Dubai, United Arab Emirates ka India ka la pynskhem ïa la ka jaka jong ka ha ka final jong ka Women’s Asia Cup hadien ba ka la jop ïa ka Bangladesh da 40 ron ha ka jingïalehkai semi-final.
Da kaba jied ban tied nyngkong, ka India ka la kamai 149/6 ha ki 20 over. Ka opener Shafali Verma ka la kamai bun tam da 64 ron na ki 40 bol, kaba kynthup ïa hynñiew tylli ki ‘four’ bad lai tylli ki ‘six’. Ki jingïarap na ka Richa Ghosh bad Deepti Sharma ki la pynkiew ïa ka jingkamai ron haduh bakut ki over.
Ki nongkawang bol Spinner ki khanglad ïa ka Bangladesh haba beh ïa ka thong ba 150 ron, ka Bangladesh ka la shem jingeh ban kamai ron pyrshah ïa ki spinner jong ka India. Ka Shree Charani ka la thoh histori da kaba khur ïa ka wiket ba 50 jong ka T20I, katba ka Deepti Sharma kaba la ïalam ha ka jingkawang bol da 3/26 ban khang ïa ka Bangladesh tang ha ka ha ka 109/7.
Da kane ka jingjop, ka India ka la pynïar ïa ka record jong ka ban poi sha ka final ha man la ka edition jong ka Women’s Asia Cup.
Ka India kan ïaleh pyrshah ïa ka team kaba jop na ka semi-final ba ar hapdeng ka Sri Lanka bad Pakistan kaba kin ïakynduh ha ka final ba kan long ha ka Sngi U Blei 13 Nailur 2026 ha kajuh ka jaka.
