Shillong, Nailur 13
U Okitlang Syiemlieh u la kylla long u nongmareh uba nyng-kong eh na ka Jylla ban shim bynta ha ka jingïakop mareh jong ka Silk Route Ultra Challenge, kaba jngai kumba 122km lyngba ka jaka kaba long kynjang na sla duriaw ha Ladakh, ha kaba u la wan ha ka thup kaba shiphew.
U Okitlang, u la wan ha ka kyrdan ba khyndai napdeng ki nongïashim bynta, ha kaba ka long shi bynta jong ka Ladakh Marathon 2026. Ha u snem ba la lah, u la wan ba khyndai ha ka jingïakop mareh kaba 72km bad mynta u snem u la lah ban pyndep da 50km.
U pulit ka Jylla, u Okitlang u la sdang ïa ka jingïakop mareh ha ka por 7 baje mynmiet jong ka 10 tarik bad ha ka sngi kaba bud ha ka por 10 baje u la lah ban pyndep.
Kane ka jingïakop mareh la wan shim bynta da ki nongmareh na kylleng ka pyrthei, ha kaba ki la mareh ha ki jaka ba long lum kynthup ïa u lum ba paw jong ka Khardung La bad Tiger Hill.
Ïa kane la ju tip kum ka jingïakop mareh kaba eh tam ha ka pyrthei namar ka long kaba duna bha ha ka liang ka lyer oxygen.
Hadien ba u la wan ka kyrdan ba khyndai, u Okitlang u la ïohpdiang ïa ka khusnam pisa kaba T. 50,000. Katba uba wan ba nyngkong u la ïoh T.5 lak.
Kum ban shu pynkynmaw ha u snem ba la lah, u Okitlang ula shim bynta ruh ha ka jingïakop mareh kaba 72km ha ka Tsomgo Ultra Marathon 4.0 kaba la long ha Sikkim, ha kaba u la khur ïa ka jingjop.
