Jowai, Nailur 13
Ka West Jaiñtia District Sports Association (WJDSA) ka la pynlong ïa ka jingïalang na ka bynta ban phah ïa ka kynhun ki nongïalehkai athletics ki ban mihkhmat ïa ka West Jaiñtia sha ka Meghalaya State Senior Athletics Championship 2026, ka ban long naduh 14 haduh 16 tarik mynta u bnai ha SAI Training Centre, Shillong.
Ïa kane ka jingïalang la pynlong ha ka sngi Thohdieng (11 tarik) ha Indoor Sports Hall jong ka WJDSA, Jowai ha kaba la pynïaid da u Cheini W. Niangti, Chairman ka Athletic Committee ka WJDSA ha kaba la wan shim bynta da ki nongkitkam ka WJDSA, Coach bad ki dkhot jong ka kynhun ïalehkai Athletics.
Na ka liang u Bah Lammat-o Laloo, Adviser ka WJDSA u la ai ka jingkitbok ryngkat ka jingkyrkhu kyrdoh ïa ki nongïalehkai ba kin pynleit jingmut bad ban trei shitom haab ki mihkhmat ïa ka district ha katei ka lympung.
Kiwei pat kiba donlang ki long u Bah Ryum Khonglah, General Secretary, WJDSA, Bah Ram Phawa, Vice President, WJDSA, Bah Ebortre Dkhar, Coach nalor kiwei pat.
Ka kynhun jong ka WJDSA ka don 26 ngut ki nongïalehkai, ki kynthup ïa 16 ngut ki shynrang bad 10 ngut ki kynthei. Kine ki nongïalehkai ki la ïaid lyngba ki jinghikai bad jingpynkhreh man ka por bad ki la khreh ban ïakhun ha ka State Championship ryngkat bad ki nongïalehkai na kylleng ka Jylla.
Ka synjuk ka la pynpaw ka jingsngewnguh ïa ki coach, ki nonghikai, ki kmie ki kpa bad ki nongïalehkai ba ki dangïai bteng bad kyrshan ha kaba pynkhreh ïa ka kynhun ïalehkai ban ïakhun ha kane ka lympung.
Te kumta ka WJDSA ka kitbok kitrwiang ïa baroh 26 ngut ki nongïalehkai bad ka kyrmen ba ka jingïashim bynta bad ka jingpyni jong ki kan ai mynsiem shuh shuh ïa ki samla ïalehkai na West Jaiñtia Hills ban shim ïa ka kam ïalehkai bad ban pynjanai ïa ka sap ïalehkai.
