Aizawl, Nailur:
Ka Mizoram Pradesh Congress Committee (MPCC) ha ka sngi Thohdieng ka la kynthoh ïa ka sorkar Zoram People’s Movement (ZPM) ba ka pynïaid beit ïa ka pisa tyngka bad ka jingbym don ïa ka polisi kamai kaba ïahap, da kaba kynnoh ba watla ka mang tyngka jong ka jylla ka la kiew palat ar shah ha ki khyndai snem, hynrei ka pisa kam shym la poi sha ki riew paidbah.
Haba kren ha ka dorbar saiñ pyrthei hangne, u Vice President ba rangbah jong ka MPCC u Lalnunmawia Chuaungo u la ong ba ka mang tyngka jong ka Mizoram ka la kiew na ka T.8,803.10 klur ha u snem 2017-18, ha ka por ba ka Congress ka dang synshar, sha ka T.17,469.91 klur ha u snem 2026-27.
“Wat hapdeng kane, ki trai dukan ha Aizawl ki shem jingeh ban die ïa ki mar jong ki namar ba ka pisa kaba ïaid ha ïew ka duna bha,” u la ong.
U Chuaungo u la kynnoh ba ka jingbym lah jong ka sorkar ban thmu bad pyndonkam hok ïa ka pisa paidbah ka la pynlong ïa ka jingbym ïaryngkat jong ka jingïaid pisa ha ka jylla.
U la buh jingkylli ruh ïa ka jingpyndonkam ïa ki Restricted Tender bad ki jingtrei jong ki tnad, da kaba ong ba wat la ki don 1,649 ngut ki kontraktor kiba la register hapoh ka PWD, hynrei ka sorkar ka la ai ïa 207 tylli ki kontrak lyngba ki Restricted Tender bad shimti ïa 689 tylli ki kam katkum ka tnad.
U nongïalam ka Congress u la kynnoh ba ïa ki projek kiba heh la pynleit jingmut hapdeng ki briew kiba rit, katba ki paidbah kiba kham heh ki shah pynduh ïa ka jingmyntoi na ka jingpynlut pisa jong ka sorkar.
U la kynthoh ruh ïa kaei kaba u khot ka jingpyndonkam palat ïa ki tender ba la khang, da kaba kynnoh ba la ai ïa ki jingmynjur ba pura watla u Myntri Rangbah ka jylla u Lalduhoma u la pynpaw kham mynshwa ba kum kine ki tender dei ban pyndonkam tang ha ki khep ba kyrpang.
U la kynthoh shuh shuh ïa ka jingpyntreikam ïa ka Mizoram Universal Health Care Scheme (MUHCS), da kaba kynnoh ba ki jingduna jong ka ki pynlong ïa ka pisa paidbah kaba bun ban pynlut shabar ka jylla bad ka ïarap ban pynduna ïa ka jingpynïaid ïa ka pisa hapoh ka jylla Mizoram.
U Chuaungo u la kynthoh ruh ïa ka sorkar ba kam shym la shim ïa ki polisi ki ban ai jingmyntoi ïa ki mar bad ki jingshakri ba la pynmih ha la ka jong ka ri, da kaba kynnoh ba kane ka ktah ïa ka jingthaw kam thaw jam bad ka jingtreikam ha ka liang ka ïoh ka kot.
“Kaei kaba ngi donkam mynta ka long ban pynthikna ba ki samla jong ngi kin ïoh ïa ki kam ki jam bad ki lad ki lynti kiba biang ban trei, da ka jingkyrkhu jong U Blei bad ki paidbah, ynda ka Congress ka la wan biang ha ka bor, ngin sa pyntreikam ïa ki polisi bad ki prokram kiba kham bha ha ka liang ka ïoh ka kot bad kiba ai jingmyntoi ïa ki riew paidbah,” u la ong.
Wat la la pyrshang bunsien hynrei ym shym la lah ban ïakynduh ïa ki heh bad ki nongïialam jong ka ZPM ban ïoh jingmut.
