Shillong, Nailur 13
U MLA ka Mawkynrew Constituency Bah Banteidor Lyngdoh u la pyllait paidbah ïa ki sopti ïalehkai (Jersey) jong ka Laitkyrhong Sports & Cultural Club hashwa ba kane ka kynhun kan shim bynta ha ka lympung ïalehkai 1st Division Football League 2025-2026 jong ka Shillong Sports Association, kaba la thmu ban sdang naduh 16 tarik mynta u bnai.
Ï aka jingpyllait ïa kitei ki sopti ïalehkai la pynlong ha ka sngi Thohdieng (11 tarik) ha Laitkyrhong, ha kaba la ïadon lang u Bah Shanroi Rynjah, Sordar Shnong Laitkyrhong, Bah Ravio Mylliem, Secretary Shnong, Bah Dikos Lymba, Asst. Sordar Shnong, Bah Andra Rynjah, Adviser ka Shnong uba dei ruh u Sordar barim ka shnong, Bah Traibor Nongkhlaw ryngkat ki riew rangbah ka Dorbar Shnong Laitkyrhong, ka Seng Samla Shnong, ki rangïalehkai ka Laitkyrhong Sports & Cultural Club, ki paidbah nongshong shnong ka Laitkyrhong bad kumjuh ruh u President Bah S. Mylliem bad Secretary Bah R. Rynjah lem ki dkot ka Laitkyrhong S&CC.
Ha katei ka sngi la batai lyngkot shaphang ka jingïaid lynti katei ka klob na u Bah R. Rynjah, Secretary ka klob, ha kaba u la ong ba naduh kaba sdang ban ïoh ïashim bynta ha Shillong League ba la pynïaid da ka Shillong Sports Association (SSA) ka dei lyngba ka jingtbin lynti u Bah Banteidor Lyngdoh bad u la ai khublei kyrpang ïa u MLA ka thaiñ ba la ïarap naduh kaba sdang bad haduh mynta.
Na ka liang u Sordar Shnong u la ïathuh ba na ka liang ka shnong ka don bynta shibun bha bad ki klob ban kyntiew ïa ki samla ha ka kam ïalehkai phutbol bad kiwei kiwei, hynrei ym lah ban len ba tang ka shnong ym lah ban pyndap bad pynbiang ban kyntiew ïa ki samla, hynrei ki long kiba donbok shibun ba don kum u Bah Banteidor uba ïohi jngai kumno ban kyntiew ïa ki samla ka dong ka thaiñ.
“Phi kynmaw bha ba naduh kaba sdang ban ïashim bynta ha ka Shillong League lada ym dei na u MLA, ngim tharai ban ïoh shim bynta ha Polo, namar kata ngi dei ban kynmaw ïa ka jingtrei shitom bad ban ai ka sngewnguh ïa baroh ki nonglehbha,” u la bynrap da kaba ong ba na ka liang ka shnong ka ai jingkyrkhu kyrdoh ïa ki rangïalehkai bad ïa ka klob ba kin ïalehkai bha ha kane ka samoi kaba mynta.
Na ka liang u kongsan Bah Banteidor u la pynkynmaw ïa ka jingïadei bad jingdon bynta lang ha ka klob naduh ba u danglong kum u MDC bad haduh mynta kum u MLA. U la ong ba ka Laitkyrhong Sports & Cultural Club ka ïoh ki nongïalam kiba trei borbah bad kiba aiti met bad mynsiem ïa ka kam, kumno ban kyntiew ïa ki kam ïalehkai khamtam ha ka liang ka phutbol. “Phi dei ban kynmaw mynshem snem, phi ïalehkai ha 2nd Division bad phi la ïoh ïa u soh ka jingtrei shitom bad mynta ka samoi pat ha ka kyrdan ïalehkai 1st Divison.”
Te kumta u Bah Lyngdoh u la sneng bad kyntu ïa ki nongpynïaid ba kin nangtrei shitom shuh shuh ban ïalam ryntih buh ryntih ha baroh ki bynta kum ka klub bad khamtam u la kyntu ïa ki rangvalehkai ban don ka mynsiem jingsngewrit, ïaïeid para nongïalehkai bad ban burom ïa ki nongpynïaid. “Haba la dei ka por ïalehkai phi dei ban mih kum ka kynhun ym dei ban kynran dien, ïakhun ban thep kol bad ban ym dei ban shah rem. Ka Laitkyrhong ka dei ka kynhun kaba khlaiñ, wat mynta phin hap ban ïakhun ha ka 1st Division, hynrei nga kwah ban ïohi ba ka Laitkyrhong kan ïalehkai ha ka Shillong Premiere League.”
