Shillong, Nailur 13
Watla u la duh noh ïa ki kti bad ki kjat, pynban u la long ka nuksa na ka bynta kito baroh kiba biang ha ki dkhot met ha kaba u Ïarapborlang Chyne u la pyni ïa ka sap jngi jong u ha ka 1st Open Swimming Competition and Masters Meet 2026, kaba la long ha ka Sngi Saitjaiñ ha True North Leisure Centre, Lapalang.
Watla kane ka jingïashim bynta kam dei ka jingïakop na bynta jong u, hynrei u Ïarapborlang u la pyni ïa ka jingkut jingmut bad ka sap jong u kaba la pynshoh biej ïa paidbah nongpeitkai kiba la risa bad thap kti ban ai ka jingïaroh ïa u ba u la lah ban pyndep ïa ka jingjngi ‘backstroke’ kaba 25 mitar. Kane ka dei ruh kawei pat ka jingjop kaba khraw ha ka jingïaid lynti jong u ban ïakhun pyrshah ïa ki jingeh kiba u la mad ha ka jingim jong u.
Ha ka rta kaba 34 snem, u Ïarapborlang u la mad ïa kawei ka jingjia kaba sngewsih bad kaba pynkylla ïa ka jingim jong u ha Nongmensong, ha u snem 2018, hadien ba u la shah bat ha ka bording ilektrik. Kane ka jingjia ka la pynlong ba hap ban ot noh ïa ki kti bad ki kjat jong u, bad u la hap ban don ha jingthiah pang la bun snem.
Watla u la mad ïa kane ka jingeh kaba khraw, u Ïarapborlang u la sdang ïa ka jingïaid lynti kaba thymmai ha ka jingim jong u lyngba ka Physical Medicine and Rehabilitation (PMR) Centre kaba don ha Laban hapoh ka jingïalam jong ka Dr. Lahunlang Sohliya, kaba la ai ka jingïarap na ka bynta jong u ha kaba u la lah ban leh ïa ki jingdonkam jong u kum ha ka ban bam hi, ban type ha ka computer bad wat ha ka ban thoh.
Da ka jingkut jingmut kaba skhem, u Ïarapborlang u la nang lah ban ïaid da kaba pyndonkam ïa ki ‘prosthetic blades’ bad u la kylla long u nongmareh lyngba ki blade ba nyngkong jong ka Jylla.
