Shillong, Nailur 14
U Myntri Rangbah ka Jylla Conrad K Sangma ha ka lah sngi u Blei u la sam ïa ka song jingïarap ba mar T.20,000 sha ki nongshong dukan madan ba la pynkynriah sha Brightwell Bungalow Barik Point bad Dhankheti.
Ha ryngkat u Myntri Rangbah la ïadonlang ha kane ka sngi ki long u Myntri ka tnad Arts & Culture bad uba long u MLA ka South Shillong u Bah Sanbor Shullai, ka MLA ka East Shillong ka Dr. Ampareen Lyngdoh bad ki Ophisar na ka tnad Urban Affairs.
Haba ai jingkren ha kane ka sngi, u Conrad u la ong ba ka jingpynkynriah ïa ki nongdie madan ka la urlong namar ka jingïatreilang jong man ki kynhun ba don bynta. “Watla ka dei kawei na ki kam ba tasam bha kaba ngi la mad namar kam dei eh tang halor ka roi ka par, hynrei ka ïasnoh bad ka kamai jakpoh jong ki briew bad ka jingpynitynnad ïa ka sor” u la ong.
U la pyntip ba ki jaka ba kongsan ha ka sor la ai lut sha ki nongshong dukan madan khnang ban pynthikna ïa ka jingbiang tarajur hapdeng ka kamai jakpoh ki nongshong dukan madan bad ka jingitynnad jong ka sor, ki surok bad ki lynti ïaid.
U la kyntu ïa ki nongjngohkai bad ki nongshong shnong ba kin leit sha kine ki jaka shong dukan madan haba pyntip ba yn sa nang kyntiew kyrdan ïa kine ki jaka shong dukan madan da ki jingput jingtem man ka janmiet lane Live Music Evenings, ki jaka leitbar, ki jaka shong, ki jingpyndait ïa ki bording ba la pynitynnad, khnang ba baroh kin lah ban pynlut por ha kine ki jaka.
Kane ka song jingïarap ba T.20,000 ka long ban kyrshan ïa ki nongshong dukan madan ban ïarap ha ka por ba ki pynkynriah ïa ki dukan. Ki nongshong dukan madan kin ïoh noh ïa ka song jingïarap ba T.10,000 lyngba ka Direct Benefit Transfer bad ka jingïarap ba T.2000 shibnai ha kine ki san bnai ban wan.
