Jowai, Nailur 14
U Ïohbor Nonglyer ula khyrwit da ka ar tylli ki hat-trick na ka bynta ban pynlong ïa ka Shillong Police ban jop da 9-1 kol pyrshah ïa ka Madan Synrang SC ha ka lympung ïalehkai 2nd Division ba la pynïaid da ka Thadlaskeiñ Sport Association (TSA) ha ka lah sngi U Blei ha Multi Sports Complex, Wahïajer.
Ha kane ka jingïakhun u Ïohbor ula thep ha ka minit 3, 33, 35, 44, 56, 60 bad 66 ha kaba la bynrap sa u Ïohborlang Kshiar (52), lem bad kawei ka jingïarap pynthep da u rangïalehkai ka liang pyrshah u Rishanme Nongtdeh (29). Katba ka shi kol jong ka Madan Synrang la thep da u Wan O Muktieh (9).
Shwa kane, ka jingïalehkai hapdeng ka Mukhla Wahchnong bad Niriang Pdienlum ka la kut da ka jingïakhaid mar 1-1 kol. Ka Niriang Pdienlum ka la pynkhih jar nyngkong lyngba u Dame Suchiang ha ka minit kaba 6, hynrei ka Mukhla Wahchnong ka la pynphai kylla lyngba u Player Suna (24).
Haba phai sha kawei pat ka jingïalehkai kaba bud, ka Nongthymme Nongdhar ka la jop da 3-1 kol ïa ka Ïawthymblien. Ïa kine la thep da u Daiohimi Lyngdoh (14), kawei la ïarap thep da u rangïalehkai ka liang pyrshah u K. Suna (22) bad Sowan Bareh (36). Katba ïa ka kol jong ka Iawthymblien la thep da u Prince Suna (6).
