Shillong, Nailur 14
Ka Mawpat SC ka la pynliem noh ïa ka Smit SC da 4-2 kol na ka bynta ban jam sha ka final jong ka lympung ïalehkai 2nd Division Football League 2026 ba la pynïaid da ka Shillong Sports Association, ha ka lah sngi U Blei.
Kane ka nam jop ka la wan urlong lyngba u Dajied Wanshong (48 & 49) uba la thep ar kol, katba ïa kiwei pat la thep da u Sylvan Langstieh (29) bad u Donbok Lyngdoh (73). Na ka liang ka Smit ka la pynphai kylla ar kol lyngba u Batskhemlang Thangkhiew (74) bad u Apburom Nongrum (87) hashwa ban kan mad ïa ka jingshah rem.
Kat kum ka video kaba la saphriang ha rynsan social media, la ïohi ïa ka jingmih ka huri hura napdeng ki para nongïalehkai jong kine ki ar kynhun ha kaba ki la ïashoh bad ktah kti para ma ki hapdeng u slap uba jur bad kaba la pynlong ba kin shah sei red card.
Haba pyrshang ban wad jingtip na ki bor pynïaid jong ki rephri ki la ïathuh ba kane ka dei tang ka jingïakhluid khlieh hapdeng ki para nongïalehkai. Na ka liang ki rephri ki la shim da ka rai kaba tyngeh da kaba sei syndon da ka red card pyrshah ïa uwei na ka Mawpat, katba ar ngut na ka Smit kaba kynthup lang ïa uwei u rangïalehkai shongben.
Kawei pat ka jingïalehkai semi final kan long ha ka sngi Ba-ar hapdeng ka Sohryngkham SC pyrshah ïa ka Mawryngkneng SC ha ka por 2:45 nohphai sngi ha SSA Stadium.
