Jowai, Nailur 14
Ka lympung ïalehkai 2nd Open to all Veteran Badminton Tournament 2025 ba ar sngi ba la pynïaid da ka West Jaiñtia District Badminton Association ka la poi sha kaba kut ha ka sngi Saitjaiñ ha Seinraij Indoor Hall, Tpep Pale, Jowai.
Ha katei ka sngi la ïadon lang u Myntri ka tnad ïalehkai ka Sorkar Jylla u Bah Wailadmiki Shylla, ha kaba u la aikhublei ïa ki nongpynïaid bad ki nongïalehkai kiba ïashim bynta.
U la pynpaw ka jingsngewnguh kyrpang ïa ka jingïashim bynta jong ki rangïalehkai ba la rim bha na West Jaiñtia, ha kylleng ka Jylla Meghalaya bad ki Jylla ba marjan. Kane ka pyni ïa ka jingmut jong ki nongïalehkai barim.
U la kyntu ïa ki samla, ban shim nuksa na ki nongïalehkai barim bha da kaba pynksan ba ka jingïalehkai kam kyntiew tang ïa ka koit ka khiah, hynrei ka pynroi ruh ïa ka jingshaniah ha ka jinglong ryntih, ka jingtreilang bad ka jinglong.
Haba ka Meghalaya ka dangpynkhreh ban pynlong ïa ka 39th National Games, u Bah Shylla u la kyntu ïa ki samla ïalehkai ba kin pyndonkam hok ïa ka kabu, ban trei shitom, ban ïaleh ban long kiba tbit ha ka jingïalehkai.
Shuh shuh u myntri u la pynpaw ruh ïa ka jingdonkam ban pynkhlaiñ ïa ki jingtei jong ki jingïalehkai Indoor ha ka Jylla da kaba ong ba ka sorkar ka la pyrshang ban pynbha ïa ki jaka kiba la don lypa.
U la pyntip ba la ïakren ïa ki mat bad ka State Sports Council bad u la pynpaw ïa ka jingkyrshan halor ka jingthmu ban seng ïa ka jaka ïalehkai ba kyrpang hapoh ïing ne Indoor, da kaba kdew ba ka jingdon jong ka jaka kaba biang ka long ka jingdonkam.
Ha katei ka sngi la sam khusnam ruh sha ki nongïalehkai kiba la khur jingjop bad ba wan ba-ar ha ki jingïakhun para marwei (singles), doubles, mixed doubles. La ïadon lang ha katei ka sngi u President Bah Dawanroi Pyrbot, General Secretary Bah Rimilan Passah, Adviser Bah James Pohsngap, Chairman Tourna-ment Committee Bah Patrick Lamare, Secretary Tournament Committee Bah Nangebormi Suting bad kiwei.
